O‘zbekiston Respublikasi Oliy ta’lim, fan va innovatsiyalar vazirligi huzuridagi Innovatsion rivojlanish agentligi

Joriy yilning 6-fevral kuni Oliy ta’lim, fan va innovatsiyalar vazirligi binosida Xitoy Xalq Respublikasining Mashinasozlik va elektrotexnika mahsulotlari eksporti va importi savdo palatasi (CCCME) hamda nufuzli “CVTE” kompaniyasi vakillaridan iborat delegatsiya bilan rasmiy uchrashuv bo‘lib o‘tdi.

Mazkur uchrashuvning asosiy maqsadi ikki tomonlama hamkorlik aloqalarini mustahkamlash, oliy ta’lim tizimini zamonaviy sanoat ehtiyojlari bilan integratsiya qilish, shuningdek, innovatsion texnologiyalarni amaliyotga joriy etish masalalarini muhokama qilishdan iborat bo‘ldi.

Uchrashuv davomida tomonlar bir qator muhim yo‘nalishlar bo‘yicha fikr almashdilar. Jumladan, oliy ta’lim va kadrlar tayyorlash masalalariga alohida e’tibor qaratildi. Oliy ta’lim tashkilotlari boshqarmasi hamda Xalqaro hamkorlik bo‘limi vakillari xitoylik hamkorlar bilan muhandislik va texnologiya yo‘nalishlarida mutaxassislar tayyorlash, ularning malakasini oshirish hamda o‘quv dasturlarini sanoat talablariga moslashtirish masalalarini muhokama qildilar.

Shuningdek, sanoatni rivojlantirish va investitsiyalarni jalb etish masalalari muhim muhokama mavzularidan biri bo‘ldi. CCCME platformasi orqali mashinasozlik va elektrotexnika sohalariga xorijiy investitsiyalarni jalb qilish, oliy ta’lim muassasalari hamda ishlab chiqarish korxonalari o‘rtasida to‘g‘ridan-to‘g‘ri hamkorlik aloqalarini yo‘lga qo‘yish istiqbollari atroflicha tahlil qilindi.

Bundan tashqari, innovatsiyalar va texnologiyalar transferi yo‘nalishida ham aniq takliflar bildirildi. Innovatsion rivojlanish agentligi hamda Texnologiyalar transferi milliy ofisi mutaxassislari “CVTE” kompaniyasi bilan birgalikda yangi ilmiy-texnik ishlanmalarni ishlab chiqarishga tatbiq etish, qo‘shma grant loyihalarini amalga oshirish hamda tajriba almashish mexanizmlarini muhokama qildilar.

Uchrashuv yakunida Xitoy tomoni vakillari — CCCME departamenti direktori Sheng Guofei va “CVTE” kompaniyasi vitse-prezidenti Lai Guangming O‘zbekistonning investitsion jozibadorligi, ta’lim sohasida amalga oshirilayotgan islohotlarni yuqori baholab, ikki tomonlama hamkorlikni yanada kengaytirishga tayyor ekanliklarini bildirdilar.

Mazkur uchrashuv oliy ta’lim va sanoat integratsiyasini mustahkamlash, innovatsion rivojlanishga xizmat qiluvchi yangi hamkorlik loyihalarini amalga oshirish uchun muhim qadam bo‘ldi.