Chust tumanida innovatsion texnologiyalar asosida qulupnay yetishtirilmoqda
2026-02-06 15:00:00 / Yangiliklar
Issiqxonaning umumiy maydoni 40 sotixni tashkil etadi. Shundan 25 sotix maydonda gidroponika usulida qulupnay yetishtirilsa, qolgan 15 sotixda sitrus mevalar parvarishi yo‘lga qo‘yilgan. Ushbu texnologiya suv va resurslarni tejash, hosildorlikni oshirish hamda yil davomida sifatli mahsulot olish imkonini bermoqda.
Bundan tashqari, tadbirkor tomonidan qo‘shimcha 0,5 gektar maydonda qulupnay ko‘chatchiligini rivojlantirish ishlari olib borilmoqda. Jumladan, 2025-yilda Koreya Respublikasidan “Sulxan” navli 20 ming tup qulupnay ko‘chati olib kelinib, ular asosida 200 ming tup ko‘chat yetishtirildi. 2026-yilda esa ushbu ko‘rsatkichni 300 ming tupga yetkazish rejalashtirilgan.
Ayni paytda issiqxonada har uch kunda o‘rtacha 200 kilogramm qulupnay hosili olinmoqda. Yetishtirilgan mahsulotlar mahalliy bozorlarga yetkazib berilib, bozor narxi 1 kilogrammi uchun 120 ming so‘mdan 250 ming so‘mgacha baholanmoqda.
Kelgusida issiqxona maydonlarini kengaytirish, hosil hajmini oshirish hamda mahsulotlarni eksport bozorlariga chiqarish rejalashtirilgan. Mazkur loyiha aholini sifatli qishloq xo‘jaligi mahsulotlari bilan ta’minlash, tadbirkorlikni qo‘llab-quvvatlash hamda yangi ish o‘rinlari yaratishda muhim ahamiyat kasb etmoqda.