O‘zbekiston Respublikasi Oliy ta’lim, fan va innovatsiyalar vazirligi huzuridagi Innovatsion rivojlanish agentligi

Ko‘zi ojiz va ko‘rish qobiliyati cheklangan insonlar uchun yozuv va ma’lumotga teng imkoniyat yaratishda ulkan rol o‘ynagan Brayl alifbosining ahamiyatini yodga olish maqsadida BMT Bosh Assambleyasi 2018-yilda 4-yanvar sanasini Xalqaro Brayl alifbosi kuni deb e’lon qilgan. Mazkur sana Brayl tizimining yaratuvchisi — fransuz pedagogi Lui Braylning tug‘ilgan kuni bilan ham bog‘liq.

Brayl alifbosi 1824-yilda, Lui Brayl atigi 15 yoshida ishlab chiqqan bo‘lib, olti nuqtadan iborat maxsus kombinatsiya asosida shakllanadi. Ushbu tizim ko‘zi ojiz insonlarga nafaqat o‘qish-yozishni, balki mustaqil ta’lim olish, axborotga kirish va jamiyat hayotida faol ishtirok etish imkonini beradi.

Bugungi kunda Brayl alifbosi dunyoning deyarli barcha mamlakatlarida qo‘llanadi. Xalqaro Brayl kuni esa inklyuziya, ta’limga teng huquq, axborotga ochiqlik va imkoniyati cheklangan shaxslarni qo‘llab-quvvatlash g‘oyalarini targ‘ib etadi.