O‘zbekiston Respublikasi Oliy ta’lim, fan va innovatsiyalar vazirligi huzuridagi Innovatsion rivojlanish agentligi

Oʻzbekiston Respublikasi Prezidentining, Oʻzbekiston Respublikasi Oliy Majlisi va Vazirlar Mahkamasining hujjatlari, davlat dasturlari va konsepsiyalarda bayon etilgan vazifa va topshiriqlarda belgilangan vazifalarni bajarilishida ilmiy yechimlarni ishlab chiqish uchun Ilmiy faoliyatga oid davlat maqsadli dasturlari doirasida bajariladigan amaliy tadqiqotlar tanlovi eʼlon qilinmoqda.

Tanlovga kelib tushgan loyihalar Oʻzbekiston Respublikasi Vazirlar Mahkamasining “Ilmiy-tadqiqot va innovatsion faoliyatni rivojlantirishning normativ-huquqiy bazasini yanada takomillashtirish chora-tadbirlari toʻgʻrisida” 2020-yil 9-martdagi 133-son qarorda belgilangan talablarga muvofiq quyidagi fan yoʻnalishlari boʻyicha eʼlon qilinadi:

1.   Arxitektura, qurilish, dizayn va shaharsozlik fanlari.

2.   Filologiya va ijtimoiy fanlari.

3.   Tibbiyot fanlari.

4.   Axborotlashtirish va axborot-kommunikatsiya texnologiyalarini rivojlantirish.

5.   Texnika fanlari.

6.   Pedagogika va psixologiya fanlari.

 

7.   Yer to‘g‘risidagi fanlar

8.  Qishloq xoʻjaligi fanlari

9.  Iqtisodiyot fanlari

Loyiha taqdim qilinganda loyiha rahbari oʻz loyihasi tadqiqot yo‘nalishidan kelib chiqib Oliy taʼlim, fan va innovatsiyalar vazirligi huzuridagi Ilmiy-texnik kengash yoʻnalishini tanlashi va shu yoʻnalish boʻyicha taqdim qilishi lozim.

Tanlovga taqdim etiladigan ilmiy loyihalar davlat ilmiy dasturlarining yagona intellektual elektron platformasi (loyiha.ilmiy.uz) orqali 2025-yil 20-noyabrdan 2025-yil 20-dekabr soat 23:55 ga qadar faqat elektron shaklda qabul qilinadi.

Tanlov shartlari.

1. Tanlovda ilmiy-tadqiqotlar oʻtkazish uchun imkoniyati va salohiyati mavjud ilmiy faoliyat subyektlari ishtirok etishi mumkin.

2. Loyiha rahbari tomonidan tanlovga faqat bitta loyiha taqdim etilishi mumkin.

3. Amaliy tadqiqot loyihalari boʻyicha ijrochi tashkilot Ilmiy (ilmiy-texnik) kengashi majlisining bayonidan koʻchirmada va bajarilishi rejalashtirilgan ilmiy loyiha yakunida qoʻlga kiritiladigan muhim ilmiy natija (yakuniy mahsulot, yangi ishlanma, texnologiya) qayd etilishi (asoslab berilishi) lozim.

4. Tanlovga bajarish muddati 3 yilgacha boʻlgan loyihalar qabul qilinadi.

5. Loyihani amalga oshirish boʻyicha ilmiy jamoaning oʻrtacha yoshi, qoida tariqasida
45 yoshdan oshmasligi kerak. (Ilmiy jamoaning oʻrtacha yoshi barcha ijrochilarning yoshini oʻrtacha arifmetik qiymati sifatida hisoblanadi).

6. Eʼlon qilingan mavzularga taqdim etiladigan ilmiy loyihalar tegishli vazirlik va idoralarning qoʻllab-quvvatlash xati mavjud boʻlganida qabul qilinadi.

7. Ilmiy loyiha maʼlumotlari Davlat ilmiy dasturlarining yagona intellektual elektron platformasi (loyiha.ilmiy.uz) orqali davlat tilida (lotin alifbosiga asoslangan oʻzbek yozuvida) kiritiladi va ijrochi tashkilotning masʼul rahbari tomonidan tasdiqlanadi.

8. Tanlovga taqdim etiladigan ilmiy loyihalar yakunida axborot tizimini ishlab chiqish, kompleks foydalanishga asoslangan dasturiy mahsulotlar, veb platformalar, mobil ilovalar yaratishga qaratilgan boʻlsa quyidagilar talab qilinadi:

a)   yaratiladigan dasturiy mahsulot uchun Adliya vazirligi huzuridagi Intellektual mulk agentligidan oʻrnatilgan tartibda roʻyxatdan oʻtkazish va EHM uchun yaratilgan dastur guvohnomasini olish vazifasi loyiha talabnomasida aks etishi;

b)  dasturiy mahsulotning loyiha yakunlangandan soʻng, uzluksiz ishlashi va zarur hollarda maʼlumotlarni yangilab borish;

c)   loyiha talabnomasida kamida uch yillik “hosting” va “domen” (mobil ilova boʻlsa, mobil ilovalar doʻkoniga joylashtirish) xarajatlarini “loyihaning boshqa shu kabi xarajatlar” bandiga kiritish.

Eslatma: Tanlovga taqdim etilgan loyihalarning har bir bosqichda koʻrib chiqish natijalari toʻgʻrisidagi maʼlumotlar loyiha rahbarlarining Davlat ilmiy dasturlarining yagona intellektual elektron platformasidagi (loyiha.ilmiy.uz) shaxsiy kabinetlarida taqdim etib boriladi.

Tanlovga taqdim etiladigan loyiha talabnomalari faqat ilmiy va innovatsion faoliyat bilan shugʻullanuvchi (ScienceID) identifikatsiyasiga ega foydalanuvchilar tomonidan davlat ilmiy dasturlarining yagona intellektual elektron platformasi (loyiha.ilmiy.uz) orqali  qabul qilinadi. “ScienceID” dan roʻyxatdan oʻtish id.ilmiy.uz tizimi orqali amalga oshiriladi. Loyihaning ijrochilari yoki loyiha rahbari boʻlmagan shaxslar tomonidan taqdim etilgan, ijrochi tashkilot rahbarining masʼul oʻrinbosari tomonidan tasdiqlanmagan loyiha talabnomalari tanlovga qabul qilinmaydi.

Ilmiy loyihalarni shakllantirish bilan bogʻliq masalalar boʻyicha Innovatsion rivojlanish agentligi masʼul xodimlari: +99871 203-32-23 (211, 219, 413, 425, 246).

“Taraqqiyot uchun tadqiqot” tanlovi mavzulari ROʻYXATI

1. “Arxitektura, qurilish, dizayn va shaharsozlik fanlari” yoʻnalishi boʻyicha:

1.1. Urbanizatsiya sharoitida uy-joylar loyiha yechimlarining ijtimoiy-iqtisodiy samaradorligi va iste’mol sifatini kompleks baholash metodologiyasini ishlab chiqish.

1.2. Suv ombori gruntli to‘g‘onlarida noturg‘un filtratsiyani va seysmik kuchlarni to‘g‘on yuqori qiyaligi turg‘unligiga ta’sirini aniqlash va uni turg‘unligini ta’minlovchi texnologiyani ishlab chiqish

2. “Filologiya va ijtimoiy fanlar” yoʻnalishi boʻyicha:

2.1. Tematik evfemizmlarning ikki tilli elektron lugʻatini yaratish.

2.2. Oʻzbek tilida chop etilgan sohaviy, izohli va imlo lugʻatlarini oʻzida jamlash va foydalanish uchun moʻljallangan elektron platformani yaratish.

3. “Tibbiyot fanlari” yoʻnalishi boʻyicha:

3.1. Bolalarda ichak mikrobiotasining shakllanishida koʻkrak suti bilan oziqlantirish davomiyligining ahamiyati va oʻrnini aniqlash hamda oʻtkir ichak infeksiyalarining erta oldini olishga oid yondashuvlarni takomillashtirish.

3.2. Bolalarda koʻkrak suti bilan oziqlantirishning tugʻma immunitetga hamda ichak mikrobiotasidagi mahalliy va fakultativ/tranzitor E.coli toʻplamining shakllanishiga taʻsirini aniqlash.

3.3. Oʻzbekiston Respublikasida urologik infeksiyalar va ularning bakteriologik peyzaji, rezistentligini tahlil qilish va baholash orqali siydik yoʻllari infeksiyalarini davolash usullarini takomillashtirish.

3.4. Respublika aholisi o‘rtasida B, C, D virusli gepatitlar va ularning uzoq muddatli asoratlarining tarqalishini baholash.

3.5. Neyron qo‘zg‘aluvchanlik disrеgulyatsiyasi sharoitida miya hujayralarini himoya qilish strategiyasini ishlab chiqish.

3.6. Lipoproteinlarning aterogen fraksiyalarini benchtop NMR spectrometer (kompakt yadroviy magnit-rezonans spektrometri YaMR) spektroskopiyasi ma’lumotlari asosida miqdoriy baholash uchun modellashtirish usulini ishlab chiqish va joriy etish.

3.7. Irsiy va kam uchraydigan orttirilgan nefropatiyalar hamda murakkab o‘smalarni aniq verifikatsiya qilishning innovatsion biomarkerlari va molekulyar-diagnostik yondashuvlarini ishlab chiqish

4. “Axborotlashtirish va axborot-kommunikatsiya texnologiyalarini rivojlantirish fanlari” yoʻnalishi boʻyicha:

4.1. Kimyoviy xavfli obyektlarda favqulodda vaziyatlarni oldini olish va ularni bartaraf etishga o‘rgatish bo‘yicha dasturiy ta’minot yaratish.

4.2. Patogen variantlar tashuvchanligini aniqlash uchun populyatsiyaga yo‘naltirilgan genetik platformani ishlab chiqish.

5.  “Texnika fanlari” yoʻnalishi boʻyicha:

5.1. Ferrosilitsiy ishlab chiqarishda hosil bo‘ladigan mikrokremniy changidan yangi turdagi import o‘rnini bosuvchi mahsulotlar olish texnologiyasini ishlab chiqish.

5.2. Vodorod generatorlarining energiya samaradorligini oshirish maqsadida elektrodlarni molibden va volfram qoplamali yangi funksional gradient material asosida yaratish.

5.3. “Olmaliq KMK” AJ sharoitida texnik ishlatilgan moylarni qayta ishlash texnologiyasini ishlab chiqish

 

6. “Pedagogika va psixologiya fanlari” yoʻnalishi boʻyicha:

6.1. Pedagogika oliy ta’lim tashkilotlarida o‘zbek tilini o‘rgatishga oid SI (sun’iy intellekt)ga asoslangan dasturiy ta'minotining yangi avlodini yaratish.

7. “Yer to‘g‘risidagi fanlar” yoʻnalishi boʻyicha:

7.1. Metallurgik ishlab chiqarishda hosil bo‘ladigan texnogen chiqindilardan germaniy metallini ajratib olish texnologiyasini ishlab chiqish.

7.2. Janubiy O‘zbekistonning yer osti arxeologik obyektlarining fazoviy tuzilishini zamonaviy noinvaziv geofizik usullar yordamida o‘rganish.

7.3. Texnogen chiqindilarni kompleks qayta ishlash orqali toza volfram metallini ajratib olish texnologiyasini ishlab chiqish.

7.4. Metallurgiya sanoatida hosil bo‘ladigan tarkibida kobalt saqlovchi chiqindilarni kompleks qayta ishlash texnologiyasini ishlab chiqish

 

8. “Qishloq xoʻjaligi fanlari” yoʻnalishi boʻyicha:

8.1. Suv manbalari va suv ta’minoti tarmoqlarida suv yo‘qotishlarini kamaytirish va tarmoq bosimlarini monitoring qilish.

8.2. Amudaryo daryosi havzasi va deltasi suvli botqoq yerlari bioxilmaxilligi va ekotizimining hozirgi holatini baholash.

9. “Iqtisod fanlari” yo‘nalishi bo‘yicha:

9.1. Oʻzbek adabiy merosini turizm sohasida integratsiya qilish.