Farg‘оnа vilоyati hоkimligi

Uchrashuvlarda viloyatimiz va Turkiya ishbilarmonlari hamkorligiga hissa qo‘shib kelayotgan tadbirkorlar Bilal Shirin, Belgin Tanriverdi va Muattar Ergen ishtirok etdilar.

Turkiyalik yirik kompaniya rahbarlari va ishbilarmonlar bilan muloqotda sanoat, avtomobilsozlik, energetika, zargarlik, qurilish, axborot texnologiyalari, qishloq xo‘jaligi, ta’lim, tibbiyot, turizm, kino va yana qator yo‘nalishlardagi hamkorlik istiqbollari borasida fikr almashildi.

Muloqotda viloyat hokimi ushbu tashrifdan ko‘zlangan maqsad turkiyalik ishbilarmonlar bilan hamkorlikni yangi bosqichga olib chiqish, yangi-yangi loyihalar bo‘yicha takliflarni o‘rganish va Farg‘onaga turkiyalik investorlarni jalb etishdan iborat ekanligini ta’kidladi. 

Viloyat rahbari bilan uchrashuvda “Aktiv group” kompaniyasi direktori Mehmet Nükte Farg‘onada sanoat o‘lkasi, tarixiy binolar taklif etilsa mehmonxona qurish, mebelchilik yo‘nalishida ham qator istiqbolli loyihalarni amalga oshirishga qiziqish bildirdi.

"Aydin gold" kompaniyasi rahbari Ibrahim Aydin bilan muloqotda zargarlik sanoati bo‘yicha yangi loyihalarni amalga oshirish, hamkorlikni yo‘lga qo‘yish borasida fikr almashildi. 

Avtomobil sanoati uchun yoqilg‘i boklari ishlab chiqaruvchi “Smtr group” kompaniyasi rahbariyati bilan suhbatda Farg‘onada ishlab chiqarish tarmog‘ini yo‘lga qo‘yish imkoniyatlari ko‘rib chiqildi. 

“Seyhan ambalaj makina” kompaniyasi qadoqlash mashinalari ishlab chiqarish bilan shug‘ullanadi. Muloqotda Quva logistika markazida ushbu kompaniya liniyasini tashkil etish masalalari bo‘yicha fikr almashildi. 

“Cabani shoes” dunyoga mashhur poyabzallar ishlab chiqaruvchi kompaniya. Mazkur kompaniyaning Toshkent va Samarqandda do‘konlari bo‘lib, uchrashuvda kompaniya tomonidan Farg‘onada ham savdo do‘koni ochish taklifi bildirildi.

Turkiyalik tadbirkor Salih Erdo‘g‘an qator davlatlarda loyihalar amalga oshirgan loyihalari haqida to‘xtalib o‘tdi. Farg‘onada ham yangi loyihalar bo‘yicha birgalikda ishlash bo‘yicha qiziqish bildirdi.

Uchrashuvlarda turk tadbirkorlarining boshqa yo‘nalishlardagi loyihalari, takliflari ham tinglandi. Viloyat hokimi turkiyalik ishbilarmonlar tomonidan bildirilgan taklif va tashabbuslarni qo‘llab-quvvatlab, ularni Farg‘onaga taklif qildi, imkoniyatlar bilan yaqindan tanishishlari va hamkorlik yo‘nalishlarini belgilib olish yuzasidan fikrlar bildirildi.

Muloqotlar yakunida ilg‘or tajribalar asosida hududlararo aloqalarni mustahkamlash, qo‘shma loyiha va dasturlarni amalga oshirish borasida ham kelishuvlarga erishildi.

Shuningdek, o‘tkazilgan uchrashuvlarda qator memorandumlar imzolandi. Xususan, Farg‘ona viloyati hokimligi va “Heyal Holding” kompaniyasi o‘rtasida Quva tumanida amalga oshirilishi rejalashtirilgan, loyiha qiymati 350 mln dollar bo‘lgan “Turk maxsus sanoat zonasi” tashkil etish bo‘yicha xalqaro hamkorlik bo‘yicha memorandum imzolandi.

Farg‘ona viloyati hokimligi va ADK group Elektrik San o‘rtasida loyiha qiymati 10 mln dollar bo‘lgan zargarlik buyumlarini ishlab chiqarish loyihasi doirasida hamkorlik yo‘lga qo‘yildi.