Farg‘оnа vilоyati hоkimligi

Viloyatda futbol sport turini yanada rivojlantirish, uning infratuzilmasini yaxshilash, iqtidorli futbolchilarni erta aniqlash va ularni professional sportga yo‘naltirish borasidagi muhim vazifalar, rejalar belgilab olindi.

Dastlab Farg‘ona shahridagi viloyat futbol akademiyasida amalga oshirilayotgan ishlar ko‘zdan kechirildi. Hozirda maktabda 6–11-sinflarda tahsil olayotgan 154 nafar o‘quvchi 7 ta guruhda malakali murabbiylar ko‘magida mahoratlarini oshirib bormoqda. 

Akademiya hududida hozirda sun’iy qoplamali va tabiiy stadion mavjud bo‘lib, mashg‘ulotlar maydoni sonini ko‘paytirish, yangi o‘rindiqlar o‘rnatish va obodonlashtirish ishlari olib borilishi belgilangan. 
O‘rganish jarayonida loyihalash ishlarini mukammal amalga oshirish, yosh futbolchilar uchun barcha sharoitlarni yaratish, moddiy-texnik bazani mustahkamlash bo‘yicha mutasaddilarga topshiriqlar berildi.

Shundan so‘ng viloyat futbol maktabi faoliyati bilan tanishildi. Bu yerda 20 nafardan ortiq murabbiy 950 nafardan ziyod yosh futbolchilarga futbol sirlarini o‘rgatib kelmoqda. 
Maktabning sun’iy qoplamali maydoni ta’mirlanib, qo‘shimcha mashg‘ulot maydoni qurilishi rejalashtirilgan. Bu ishlar natijasida tarbiyalanuvchilar uchun yanada qulay sharoitlar yaratilib, mashg‘ulotlar samaradorligi oshiriladi. 

Ravshan Ermatov istiqbolli va iqtidorli futbolchilarni tarbiyalash, tajribali murabbiylarni ko‘paytirish hamda ularni milliy terma jamoaga ko‘proq yo‘naltirish zarurligini alohida ta’kidladi.

Yaqinda butunlay qayta ta’mirdan chiqarilgan “Neftchi” futbol klubining zamonaviy infratuzilmaga ega qarorgohi ham ko‘zdan kechirildi. Majmua hududida 2 ta yangi futbol maydoni barpo etilib, endilikda futbolchilar 3 ta jahon standartlariga mos stadionda mashg‘ulot olib borish imkoniyatiga ega bo‘ldilar. Yangilangan bazada futbolchilar va murabbiylar uchun barcha sharoitlar — zamonaviy oshxona, mashg‘ulot zallari, suzish havzasi, tibbiyot xonasi va boshqa zarur inshootlar tashkil etilgan. Shuningdek, bu yerda asosiy jamoa bilan birga U-19, U-21 va ayollar jamoalari uchun ham yotoqxonalar, mashg‘ulot maydonlari, sport zallari va o‘quv xonalari faoliyat yuritmoqda.

Ravshan Ermatov yaratilgan sharoitlarga yuqori baho berdi, viloyatda futbolni rivojlantirish uchun katta imkoniyatlar borligini qayd etdi. O‘rganishlar yakunida O‘zbekiston futbol assosiatsiyasi va viloyat hokimligi hamkorligida amalga oshiriladigan ishlar kelishib olindi.