Farg‘оnа vilоyati hоkimligi

Ochilish marosimida viloyat hokimi Xayrullo Bozorov, investorlar, jamoatchilik vakillari ishtirok etdi.

Viloyat hokimi istiqbolli va muhim loyihani ishga tushirilishi bilan tadbir ishtirokchilarini tabrikladi. Prezidentimiz tashabbusi bilan mamlakatimizda sanoatning barcha yo‘nalishlari, shu jumladan, zargarlik sohasini rivojlantirish borasidagi islohotlar, ishlab chiqaruvchilarni qo‘llab-quvvatlash, berilayotgan imtiyozlar xususida so‘z yuritib, mazkur korxona ana shu ishlarning amaliy samarasi ekanligini bildirdi.

Korxona ochilishi viloyatimizda yana bir tarixiy voqea bo‘lgani, zargarlik mahsulotlarini nafaqat ichki bozorda sotish, balki tashqi bozorda ham o‘z o‘rnini topish bo‘yicha muhim qadamlar tashlangani qayd etildi.

Zargarlik hunarmandchiligi mamlakatimizda, ayniqsa, vodiy viloyatlarida qadimdan rivojlanib kelgani, bugun sanoatga aylantirish vaqti yetgani, qisqa muddatda mazkur korxona to‘la quvvatda ishga tushganligi ta’kidlandi.

Prezidentimizning “Zargarlik buyumlarini ishlab chiqarish sohasini qo‘llab-quvvatlash bo‘yicha qo‘shimcha chora tadbirlar to‘g‘risida”gi qarori ijrosi asosida Respublika bo‘yicha uchinchi zargarlik markazi Farg‘onada ochilganiga e’tibor qaratildi.

Bu esa ishlab chiqaruvchilarga imtiyozlar, imkoniyatlar berishi, ularni jadal rivojlanib, bozorga tezroq kirib borishlariga yo‘l ochishi aytib o‘tildi.

Loyiha tashabbuskorlari hamda “O‘zbekzargarsanoati” uyushmasi mutasaddilariga hamkorlik uchun minnatdorlik bildirilib, markaz dunyo zargarlik sanoatida ham alohida ajralib turishiga tilak bildirildi.

Turkiyalik investor Jemil Aklli va ozarbayjonlik ishbilarmon Nail Shaxverdiyev ham so‘z olib, bu loyiha dastlabkisi bo‘lib, kelgusida hamkorlikda yana ko‘plab istiqbolli loyihalar bo‘yicha birgalikda ishlashga tayyor ekanliklarini aytib o‘tishdi.

“AMASTA” xorijiy korxonasining “Ferga gold” brendi ostidagi mahsulotlari xalqaro standartlarga javob bera olishi bilan birga, zamonaviy dizayn va yuqori sifat orqali yurtimiz va xalqaro bozorlarga kirib borishni maqsad qilgan.

Korxona eng zamonaviy va yuqori texnologiyalarga asoslangan bo‘lib, loyiha qiymati 6 million dollarni tashkil etadi. Zargarlik yo‘nalishida 300 ta yuqori daromadli ish o‘rni yaratish ko‘zda tutilgan, hozirda 60 nafar aholi ishga qabul qilindi.

Turkiya va Ozarbayjonlik investorlar bilan hamkorlikda yillik umumiy qiymati 2,2 trillion so‘mlik 1,5 tonna zargarlik buyumlari tayyorlanadi.

Farg‘onada ishlab chiqarilayotgan mahsulotlar nafaqat mahalliy bozorda sotiladi, shuningdek, AQSH, Birlashgan Arab Amirliklari, Singapur, Turkiya va Xitoy kabi yirik bozorlarga ham eksport qilinadi.

Tadbir davomida ramziy lenta qirqilib, mehmonlar  korxonadagi ish jarayonlari, mahsulotlar bilan yaqindan tanishdilar.