Janubiy Koreya kompaniyasi bilan hamkorlikning istiqbolli yo‘nalishlari ko‘rib chiqildi
2026-10-28 14:00:00 / Yangiliklar
Uchrashuvda kompaniya vakillari bilan avvalgi muloqotlarda muhokama qilingan energetika sohasidagi o‘zaro manfaatli hamkorlik masalalari yuzasidan muzokaralar davom ettirildi.
Xususan, Farg‘ona viloyatida elektr va issiqlik energiyasi ishlab chiqarish korxonasini barpo etishga qaratilgan istiqbolli investitsiya loyihasini amalga oshirish imkoniyatlari ko‘rib chiqildi.
Muloqot davomida KDHC kompaniyasining markazlashgan issiqlik ta’minoti va sovutish tizimlari, kogeneratsiya asosida elektr energiyasi ishlab chiqarish, energiya tejamkor texnologiyalar hamda qayta tiklanuvchi energiya manbalarini joriy etish borasidagi ilg‘or tajribasi muhokama qilindi.
Ushbu tajribani viloyatda tatbiq etish, issiqlik ta’minoti tizimlarini modernizatsiya qilish va energiya samaradorligini oshirish masalalariga alohida e’tibor qaratildi. Shuningdek, hamkorlikning keyingi bosqichlarida amalga oshiriladigan ishlar, istiqbolli loyihalarni batafsil o‘rganish, aniq chora-tadbirlar rejasini ishlab chiqish va ularni bosqichma-bosqich hayotga tatbiq etish masalalari yuzasidan fikr almashildi.
Uchrashuv yakunida belgilangan yo‘nalishlarda muzokaralarni davom ettirish va hamkorlikni amaliy loyihalar bilan mustahkamlashga kelishib olindi.