Til bor ekan, millat barhayot: O‘zbek tili bayrami Farg‘onada keng nishonlanmoqda
2026-10-21 12:10:00 / Yangiliklar
21-oktabr — O‘zbek tili bayrami kuni munosabati bilan Farg‘ona shahrida o‘tgan tantanada ham ayni jihatlarga alohida e’tibor qaratildi.
O‘zbek adabiy tilining asoschisi, buyuk shoir, mutafakkir va davlat arbobi Alisher Navoiy haykali oldida tashkil etilgan tadbirda viloyat hokimligi, boshqarma va tashkilotlar, ta’lim muassasalari vakillari, yozuvchi va shoirlar, adabiyotshunos olimlar, yoshlar hamda keng jamoatchilik ishtirok etdi.
Tadbirda viloyat hokimining o‘rinbosari Sherzod Polvonov so‘z olib, yig‘ilganlarni O‘zbek tili bayrami bilan qutladi.
Ona tilimizga davlat tili maqomi berilgani milliy o‘zligimizni anglash, ma’naviy merosimizni asrash va milliy qadriyatlarimizni mustahkamlash yo‘lidagi tarixiy qadam bo‘lgani qayd etildi.
Prezidentimiz tashabbusi va rahbarligida o‘zbek tilini davlat tili sifatidagi nufuzi va mavqeini yuksaltirish borasida olib borilayotgan chora-tadbirlar haqida to‘xtalib o‘tildi.
O‘zbek tilining davlat boshqaruvi, ta’lim, ilm-fan, ommaviy axborot vositalari va raqamli texnologiyalar sohalaridagi imkoniyatlarini kengaytirish jarayonlari to‘g‘risida so‘z yuritildi.
Shuningdek, adabiyotshunos olimlar va soha vakillari ham til madaniyatini yuksaltirish, yoshlarda ona tiliga hurmat tuyg‘usini mustahkamlash, kitobxonlikni rag‘batlantirish muhim vazifa va mas’uliyat ekanini ta’kidladilar.
Erkin Vohidov nomidagi ijod maktabi o‘quvchilarining chiqishlari, teatrlashtirilgan sahna ko‘rinishlari va mumtoz qo‘shiqlar tadbirga alohida fayz bag‘ishladi.
Tantana yakunida Alisher Navoiy haykali poyiga gulchambarlar qo‘yilib, buyuk mutafakkir xotirasiga hurmat bajo keltirildi.
Joylarda O‘zbek tili bayramiga bag‘ishlangan ma’rifiy-madaniy tadbirlar davom etmoqda.