Farg‘оnа vilоyati hоkimligi

Viloyat hokimligi tomonidan tashkil etilgan tadbirda ommaviy axborot vositalari vakillari hamda blogerlar ishtirok etdi.

“Farg‘ona hududiy elektr tarmoqlari” AJ direktori Azizbek Saydaliyev va “Hududgaz Farg‘ona” gaz ta’minoti filiali direktori Shavkatjon Abdumajidov viloyatimizda kuz-qish mavsumiga tayyorgarlik hamda “Yangiyo‘l tajribasi” asosida Farg‘ona tumanida olib borilayotgan ishlar haqida ma’lumot berdilar.

Ta’kidlanganidek, joriy yilning 27-iyul kuni Prezident Shavkat Mirziyoyev raisligida yoqilg‘i-energetika tarmog‘ini yanada rivojlantirish va sohadagi ustuvor vazifalar yuzasidan o‘tkazilgan videoselektor yig‘ilishida belgilangan topshiriqlar ijrosi doirasida elektr va gaz ta’minoti bilan bog‘liq ishlar “tumanbay” hamda “mahallabay” tashkil etilmoqda.

“Yangiyo‘l tajribasi”ni joriy etish uchun viloyatda Farg‘ona tumani tanlab olinib, iste’molchilarni energiya resurslari bilan barqaror ta’minlash, energiya samaradorligini oshirish, tarmoqlardagi yo‘qotishlar va debitorlik qarzdorligini kamaytirish bo‘yicha manzilli chora-tadbirlar belgilangan.

Xususan, tumandagi 71 ta mahallaning energetik pasporti hamda energiya resurslariga talab balansi shakllantirildi. Bu transformatorlar, gaz taqsimlash qurilmalari va tarmoqlarni yangilashga ehtiyoj mavjud hududlarni, energiya yo‘qotishlari yuqori bo‘lgan nuqtalarni hamda birinchi navbatda hal etilishi lozim bo‘lgan muammolarni aniqlashga xizmat qilmoqda.

Press-tur doirasida “Hududgaz Farg‘ona” gaz ta’minoti filialining Farg‘ona tuman bo‘limida amalga oshirilgan ishlar taqdimoti o‘tkazildi. Ishtirokchilar tumandagi “Mehnatobod” va “Beruniy” mahallalarida bo‘lib, tabiiy gaz hamda elektr energiyasi ta’minoti barqarorligini oshirish yuzasidan olib borilayotgan ishlar bilan yaqindan tanishdilar.

Jurnalist va blogerlarni qiziqtirgan savollarga soha mas’ullari batafsil javob berdilar.