Qo‘qonda Farg‘ona vodiysi aholisi va yoshlari uchun O‘zbekiston – Yaponiya markazi ochildi
2026-10-08 17:10:00 / Yangiliklar
Tadbirda Farg‘ona viloyati hokimi Xayrullo Bozorov, Yaponiya xalqaro hamkorlik agentligi (JICA) ijrochi katta vitse-prezidenti Miyazaki Katsura, Yaponiyaning O‘zbekistondagi Favqulodda va Muxtor elchisi Xirata Kendji, keng jamoatchilik vakillari ishtirok etdi.
Tantanali marosimda so‘z olgan viloyat hokimi Xayrullo Bozorov mazkur markazning ochilishi O‘zbekiston va Yaponiya o‘rtasidagi do‘stlik, o‘zaro ishonch va strategik sheriklik munosabatlarini yanada mustahkamlashda muhim ahamiyat kasb etishini ta’kidladi.
Qayd etilganidek, Prezidentimiz Shavkat Mirziyoyev tashabbuslari va Yaponiya hukumatining qo‘llab-quvvatlashi natijasida ikki mamlakat o‘rtasida iqtisodiyot, ta’lim, sog‘liqni saqlash, infratuzilma va madaniyat sohalaridagi hamkorlik izchil rivojlanmoqda. Bu jarayonda JICA agentligi muhim o‘rin tutmoqda.
Yangi ochilgan markaz Qo‘qon shahri va Farg‘ona vodiysi aholisiga yapon tili kurslari, biznes treninglari, ta’lim dasturlari va ikki davlat hamkorligiga qaratilgan loyihalarda ishtirok etish imkonini beradi. Markazda har yili 200 nafardan ortiq yoshlar tahsil olish mumkin. Ayniqsa, yoshlarning yapon tilini puxta egallashi, kelgusida kunchiqar mamlakatda ta’lim olishi va mehnat faoliyatini yo‘lga qo‘yishi uchun yangi imkoniyatlar ochilmoqda.
Bu yerda tadbirkorlar Yaponiyaning ilg‘or biznes tajribasini o‘rganish, yapon ishbilarmon doiralari bilan to‘g‘ridan-to‘g‘ri aloqalar o‘rnatish hamda o‘zaro manfaatli hamkorlikni rivojlantirish imkoniyatiga ega bo‘ladilar.
Viloyat hokimi markaz faoliyatini har tomonlama qo‘llab-quvvatlash, uning dasturlarini hududdagi ta’lim muassasalari va tadbirkorlik subyektlari bilan uzviy bog‘lashga tayyor ekanini bildirdi.
Tantanali marosimda Yaponiyaning O‘zbekistondagi Favqulodda va Muxtor elchisi Xirata Kendji, O‘zbekiston va Yaponiya xalqaro hamkorlik agentligi (JICA) ijrochi katta vitse-prezidenti Miyazaki Katsura ikki davlat o‘rtasidagi ko‘p qirrali hamkorlikni yanada kengaytirish, ta’lim va tadbirkorlik sohalarida yangi tashabbuslarni amalga oshirish muhimligini ta’kidladi. Yangi markaz Farg‘ona vodiysida ikki mamlakat o‘rtasidagi aloqalarni faollashtirishda muhim tayanch bo‘lishini bildirdi.
Ramziy lenta qirqilib, ishtirokchilar markazda yaratilgan sharoitlar bilan tanishdilar.