Farg‘onadagi O‘zbekiston–Rossiya Hududlar kengashi Rossiya OAVlari e’tiborida
2026-10-07 13:20:00 / Yangiliklar
5–6-oktabr kunlari Farg‘ona viloyatida bo‘lib o‘tgan O‘zbekiston Respublikasi va Rossiya Federatsiyasi hududlari Kengashining III yig‘ilishi Rossiya va O‘zbekistonning qator nufuzli ommaviy axborot vositalarida keng yoritildi.
Xususan, Rossiyaning "Interfaks" axborot agentligi 6-oktabr kuni Kengash haqida material e’lon qilib, Rossiya Prezidenti Vladimir Putinning tadbir ishtirokchilariga yo‘llagan tabrigiga alohida e’tibor qaratdi. Unda Rossiyaning qariyb 80 ta subyekti O‘zbekiston bilan savdo-iqtisodiy, ilmiy-texnik va gumanitar aloqalarga jalb etilgani, yuzlab qo‘shma loyihalar amalga oshirilayotgani qayd etildi.
"Kommersant" nashri 5-oktabr kuni Farg‘onada o‘tayotgan III Hududlar kengashi doirasidagi muzokaralarni yoritib, forumning ishbilarmonlik dasturida qishloq xo‘jaligi, qurilish, logistika va sanoat sohalaridagi hamkorlik masalalari o‘rin olganini ma’lum qildi.
"Vedomosti" nashrida 6-oktabr kuni Krasnoyarsk o‘lkasi gubernatori Mixail Kotyukovning Farg‘onaga tashrifi hamda Kengash doirasida o‘tkazilgan "Sibir kunlari" haqida material e’lon qilindi. Unda Krasnoyarsk o‘lkasidan transport, mashinasozlik, yog‘ochni qayta ishlash, qadoqlash va raqamli texnologiyalar yo‘nalishida faoliyat yurituvchi 12 ta kompaniya vakillari Farg‘onada ishbilarmonlik muzokaralarida ishtirok etgani qayd etilgan.
NIA-Krasnoyarsk axborot agentligi ham Farg‘onadagi tadbirlarni yoritib, "Sibir kunlari"da Krasnoyarsk va Oltoy o‘lkalari, Novosibirsk, Tomsk, Omsk viloyatlari hamda Oltoy Respublikasi — jami 6 ta Sibir hududi ishtirok etayotganini xabar qildi.
Rossiya Federatsiyasi Hukumatining rasmiy axborot resursida esa Rossiya Hukumati Raisining birinchi o‘rinbosari Denis Manturovning Farg‘onada o‘tkazilgan Hududlar kengashi yig‘ilishida ishtirok etgani haqida alohida axborot e’lon qilindi.
O‘zbekiston axborot maydonida ham tadbir keng yoritildi. Sputnik O‘zbekiston 5-oktabr kuni Farg‘onada III Hududlar kengashi o‘z ishini boshlagani, "Farg‘ona ekspo"da panel sessiyalari, muzokaralar va ko‘rgazmalar tashkil etilgani, shuningdek, Sibirning 17 ta oliy ta’lim muassasasidan iborat delegatsiya Farg‘onaga kelgani haqida xabar berdi.
Spot nashri ma’lumotiga ko‘ra, 6-oktabr kuni o‘tkazilgan Kengash yig‘ilishida O‘zbekistonning barcha hududlari, Rossiyaning 17 ta hududi hamda ikki mamlakatdan qariyb 400 nafar tadbirkor ishtirok etdi. Shuningdek, ikki mamlakat hududlari o‘rtasidagi kooperatsiya portfeli 200 dan ortiq, umumiy qiymati qariyb 6 milliard dollarlik loyihalarni qamrab olgani qayd etildi.
Farg‘onada ilk bor o‘tkazilgan ushbu nufuzli xalqaro tadbirning xorijiy va mahalliy OAVlarda keng yoritilishi viloyatning sanoat, investitsiya, eksport va turizm salohiyatini xalqaro axborot maydonida yanada keng namoyish etishga xizmat qildi.