Farg‘оnа vilоyati hоkimligi

Shu munosabat bilan tashkil etilgan tadbirda viloyat hokimi Xayrullo Bozorov, O‘zbekiston futbol assotsiatsiyasi birinchi vitse-prezidenti Ravshan Ermatov, futbol mutaxassislari va murabbiylar, sport faxriylari hamda yoshlar ishtirok etdi.

Tadbirda so‘z olgan O‘zbekiston futbol assotsiatsiyasi birinchi vitse-prezidenti Ravshan Ermatov Prezidentimiz tashabbusi va e’tibori bilan mamlakatimizda sport infratuzilmasi tubdan yangilanayotgani, futbolni rivojlantirish, yosh iqtidorlarni qo‘llab-quvvatlash uchun zamonaviy sharoitlar yaratilayotganini ta’kidladi.

Viloyat futbol akademiyasida ham xalqaro talablarga javob beradigan ikkita standart futbol maydonining foydalanishga topshirilishi Farg‘onada professional futbol rivoji uchun yana bir muhim qadam ekani qayd etildi. Bu boradagi yaqin hamkorlik va amaliy ko‘mak uchun viloyat hokimiga minnatdorlik bildirildi.

Shuningdek, Farg‘ona futbol maktabining boy tarixi va an’analari, mamlakat futboli rivojiga qo‘shgan hissasi alohida e’tirof etildi. “Neftchi” futbol klubi o‘zining munosib shon-shuhratini tiklayotgani Farg‘ona futboli uchun muhim voqea ekani ta’kidlandi.

Yaratilgan bunday zamonaviy sharoitlar kelgusida O‘zbekiston milliy terma jamoasi safida to‘p suradigan, xalqaro maydonlarda mamlakatimiz sharafini munosib himoya qiladigan mahoratli futbolchilarni tarbiyalashga xizmat qilishiga ishonch bildirildi.

Viloyat hokimi Xayrullo Bozorov so‘zga chiqib, barchani zamonaviy futbol maydonining foydalanishga topshirilishi bilan tabrikladi.

— O‘zbek futboli uchun tarixiy yillar bo‘lmoqda. Milliy terma jamoamizning jahon chempionatida ishtirok etishi mamlakatimiz futboli tarixida yangi sahifa ochdi. Prezidentimiz tomonidan futbolni rivojlantirish, yoshlar uchun zamonaviy sharoitlar yaratishga katta e’tibor qaratilmoqda. Hududlarda yangi futbol maydonlari barpo etilyapti. Ishonamanki, kelajakda dunyoning eng kuchli ligalarida to‘p suradigan o‘zbek futbolchilari mana shunday maydonlardan yetishib chiqadi. Haqiqiy futbol mana shu maydonlardan boshlanadi. Buning uchun barcha zarur sharoitlarni yaratib beramiz, — dedi viloyat rahbari.

Kelgusi yili Qo‘qonda futbolning 115 yilligi nishonlanishi qayd etildi. Shuningdek, “Istiqlol” stadionini kengaytirish va yanada zamonaviylashtirish bo‘yicha takliflar tayyorlanayotgani ma’lum qilindi. Farg‘onani futbol markaziga aylantirishdek katta maqsad yo‘lida ko‘plab ishlar amalga oshirilishi ta’kidlandi.

Tadbir davomida nuroniylar, sport faxriylari va yoshlar sportga, xususan, futbol rivojiga qaratilayotgan yuksak e’tibor va yaratilayotgan sharoitlar uchun Prezidentimizga minnatdorlik bildirdilar.

Shundan so‘ng ramziy lenta qirqilib, yangi va zamonaviy futbol maydonlari yosh sportchilar ixtiyoriga topshirildi.

Ayni paytda viloyat futbol akademiyasida 2008–2014-yillarda tug‘ilgan 154 nafar yosh futbolchi muntazam shug‘ullanmoqda. Akademiya tarbiyalanuvchilari va bitiruvchilari bugungi kunda turli nufuzli musobaqalarda munosib natijalarni qayd etib kelmoqda.