“Neftchi” va Koreyaning “Paju Frontier FC” futbol klubi o‘rtasida hamkorlik yo‘lga qo‘yildi
2026-09-12 15:15:00 / Yangiliklar
Tadbirda viloyat hokimi Xayrullo Bozorov futbol shunchaki sport turi emas, balki millionlab insonlarni bir maqsad atrofida birlashtiradigan, ularga zavq va ko‘tarinki kayfiyat bag‘ishlaydigan, xalqlar o‘rtasidagi do‘stlik rishtalarini mustahkamlaydigan muhim vosita ekanini ta’kidladi.
Ayniqsa, Koreya Respublikasida tahsil olayotgan va mehnat qilayotgan farg‘onalik hamda vodiylik yoshlarning birlashib, “Neftchi Koreya” futbol jamoasini shakllantirgani va mahalliy musobaqalarda munosib ishtirok etayotgani yuqori baholandi.
Viloyat rahbari yoshlarning bu tashabbusi nafaqat ularni bir maqsad atrofida jipslashtirayotgani, balki Farg‘onaning futbol an’analari, “Neftchi” klubi va O‘zbekistonni Koreyada keng targ‘ib qilishga xizmat qilayotganini qayd etib, ularga minnatdorlik bildirdi.
“Paju Frontier FC”ni kelgusida o‘z nomi va muvaffaqiyatlariga ega bo‘lgan kuchli jamoalardan biriga aylanishi yo‘lida omad tiladi.
“Paju Frontier FC” bosh menejeri Xvan Bo Kvan ham ikki jamoa o‘rtasidagi hamkorlikni rivojlantirish istiqbollariga to‘xtalib, o‘zaro tajriba almashish, futbolchilarning mahoratini oshirish va yosh iqtidorlarni qo‘llab-quvvatlash borasidagi aloqalar muhim ahamiyat kasb etishini ta’kidladi.
Uchrashuv yakunida Farg‘onaning “Neftchi” va Koreyaning “Paju Frontier FC” futbol klublari o‘rtasida hamkorlik memorandumi imzolandi.