Yaponiya kompaniyasi bilan hamkorlikning yangi yo‘nalishlari muhokama qilindi
2026-09-04 15:30:00 / Yangiliklar
Uchrashuvda Farg‘ona viloyatida investitsiyaviy hamkorlikni kengaytirish, yapon texnologiyalari asosida yangi loyihalarni amalga oshirish masalalari haqida so‘z bordi.
O‘zbekiston va Yaponiya o‘rtasidagi so‘nggi yillarda strategik sheriklik munosabatlari izchil rivojlanayotgani, hamkorlik yangi bosqichga ko‘tarilayotgani qayd etildi.
Hududlararo aloqalarni kengaytirish, yapon investorlari ishtirokidagi loyihalarni ko‘paytirish va yangi investitsiya tashabbuslarini qo‘llab-quvvatlash bo‘yicha fikr almashildi. Delegatsiyalar tashriflari bu jarayonda muhim ahamiyat kasb etayotgani ta’kidlandi.
Farg‘ona viloyatida Yaponiyaning ilg‘or tajribasidan foydalanishga alohida e’tibor qaratilayotgani, ta’lim sohasida yapon o‘qitish metodikasi tajriba-sinov tariqasida joriy etilgani, oliy ta’lim muassasalarida ham zamonaviy yondashuvlar asosida mutaxassislar tayyorlanayotgani aytib o‘tildi.
“Mitsui & Co., Ltd” — Tokio shahrida joylashgan yirik xalqaro savdo va investitsiya kompaniyasi bo‘lib, 62 ta mamlakatda faoliyat yuritadi. O‘zbekistonda 1993-yilda o‘z ofisini ochgan. Kompaniya energetika, infratuzilma, transport, qishloq xo‘jaligi va oziq-ovqat sanoati, kimyo, raqamli texnologiyalar, logistika va boshqa yo‘nalishlarda investitsiya loyihalarini amalga oshiradi.
Muloqotda neft sanoati, suv ta’minoti, meva-sabzavotlarni qayta ishlash, infratuzilma, turizm va ta’lim sohalarida qo‘shma loyihalarni amalga oshirish takliflari bildirildi.
Kunchiqar yurt kompaniyasi faoliyat yo‘nalishlaridan kelib chiqib kelgusida hamkorlikni jadal davom ettirish chora-tadbirlari kelishib olindi.
Uchrashuvda “Mitsui & Co., Ltd” kompaniyasining Qozog‘istondagi bosh vakolatxonasi bosh vakili To‘lqinjon Rahimov hamda viloyat hokimining birinchi o‘rinbosari Mirzohid Ubaydullayev ham ishtirok etdi.