Farğоnа vilоyati hоkimligi

Unda viloyat faollari, shahar va tumanlardan keng jamoatchilik vakillari – nuroniylar, mehnat ilg‘orlari, tadbirkorlar va yoshlar, shuningdek, Tojikistonning So‘g‘d hamda  Qirg‘izistonning Botken viloyatidan kelgan mehmonlar ishtirok etdi.

Tantanali tadbirda viloyat hokimi Xayrullo Bozorov so‘zga chiqib, Farg‘ona ahlini mustaqillik bayrami bilan samimiy muborakbod etdi.

Tantanalarning Burhoniddin Marg‘inoniy nomi bilan ataluvchi ilmiy-ma’rifiy va turizm majmuasida o‘tkazilayotgani alohida ramziy ma’noga ega ekani ta’kidlandi. Zero, buyuk alloma merosi adolat, ilm, qonun va ma’rifat kabi yuksak qadriyatlarni mujassam etgan. Ushbu maskanda Mustaqillik bayramini nishonlash tarix va bugungi taraqqiyot, milliy meros va Yangi O‘zbekiston g‘oyalari uyg‘unligini namoyon etadi.

Viloyat rahbari, ayniqsa, so‘nggi o‘n yilda Prezidentimiz boshchiligida  mamlakatimizda amalga oshirilayotgan islohotlar Farg‘ona hayotida ham keng ko‘lamli o‘zgarishlarga zamin yaratayotganini qayd etdi.
 
Xususan, so‘nggi to‘qqiz yilda viloyat yalpi hududiy mahsuloti 1,6 barobar o‘sib, 111 trillion so‘mdan oshdi. Shu davrda 8,2 milliard dollar xorijiy investisiya jalb qilinib, qariyb 7 ming 900 ta loyiha amalga oshirildi va 196 mingta yangi ish o‘rni yaratildi. Kichik biznes sub’yektlari soni 18,8 mingtadan 50,7 mingtaga, eksport hajmi esa 395 million dollardan 1,3 milliard dollarga yetdi. Bugun Farg‘ona tadbirkorlari mahsulotlari dunyoning 65 ta bozorlariga kirib bormoqda.

Qishloq xo‘jaligida zamonaviy agrotexnologiyalarni joriy etish, suv tejovchi usullardan foydalanish va mahsulotni chuqur qayta ishlashga e’tibor kuchaytirilmoqda. Oziq-ovqat xavfsizligini ta’minlashda fermer, dehqon va klasterlarning o‘rni katta bo‘lmoqda. Paxta dalalarida 70-80 syentnerdan hosil yetishtirlayotgani esa quvonarli.
 
Viloyatning turizm salohiyatini rivojlantirish borasida ham salmoqli natijalar qayd etildi. 2016 yilda Farg‘onaga 246 ming nafar sayyoh kelgan bo‘lsa, 2025 yilda ularning soni 3,8 million nafarga yetdi. Turizm eksporti 185 million dollarni tashkil etdi.

E’tiborlisi, yangi ish o‘rinlari, aholi daromadlarining ortishi, tadbirkorlik imkoniyatlarining kengayishi va oilalar farovonligining yuksalishi islohotlarning bosh maqsadi bo‘lib, inson qadri uchun xizmat qilmoqda.
 
Prezidentimiz Mustaqilligimizning 35 yilligiga bag‘ishlangan tantanali marosimda mamlakatimiz taraqqiyotining kelgusi bosqichini belgilab berganligi, kelgusi o‘n yillik O‘zbekiston uchun milliy yuksalish davri bo‘lishi ta’kidlandi.
Shu maqsadda inson qadri va xalq farovonligini ta’minlashga qaratilgan yettita milliy dastur asosida viloyatimizda ham keng ko‘lamli ishlar amalga oshirilishi qayd etildi.

Viloyat rahbari Farg‘ona futbolidagi yutuqlar va istiqbolli rejalar haqida ham to‘xtalib o‘tdi.

Prezidentimiz rahbarligida futbolni rivojlantirish, sog‘lom raqobat va shaffof tizimni qaror toptirish, futbol maktablari hamda akademiyalar faoliyatini kuchaytirish borasida amalga oshirilayotgan islohotlar o‘z samarasini berayotgani tilga olindi.

Jumladan, “Neftchi” klubining o‘tgan mavsumda mamlakat chempioni va Superkubok sohibi bo‘lgani, joriy mavsumda ham peshqadamlar safida borayotgani ta’kidlandi. Jamoaning Osiyo chempionlar ligasi elita bosqichida ishtirok etishi Farg‘ona futboli uchun muhim voqea ekani qayd etilib, viloyatni mamlakatning futbol poytaxtiga aylantirish maqsadi sari ishlar davom ettirilishi aytildi.

Shu bilan birga farg‘onaliklar oldida  yanada katta va baland marralar turganligi, viloyat har tomonlama eng taraqqiy etgan hududga aylanishi uchun barcha chora-tadbirlar belgilab olingani qayd etildi.
 

Tadbir davomida teatrlashtirilgan bayram dasturi namoyish etildi.

O‘zbekiston xalq artisti Yulduz Usmonova, O‘zbekiston xalq hofizi Ilhom Ibrohimov, Qirg‘iziston Respublikasida xizmat ko‘rsatgan artist Samara Karimova, Jaloliddin Ahmadaliyev, Bahodir Mamajonov, Qilichbek Madaliyev, Zohirshoh Jo‘rayev, Abdujalil Qo‘qonov, Gʻaybulla Tursunov va boshqa san’atkorlar, yosh iste’dodlar ijrosidagi Vatanni, sevgi-muhabbatni tarannum etgan kuy-qo‘shiqlar barchaga bayramona kayfiyat ulashdi.
 
Tantanali marosim osmon uzra porlagan yorqin mushakbozlik bilan yakunlandi.