Farg‘оnа vilоyati hоkimligi

Viloyat hokimi Xayrullo Bozorov bugun Chjan Chjunxua boshchiligidagi xitoylik investorlar delegatsiyasini qabul qildi.

Uchrashuvda Farg‘ona viloyatida xitoylik hamkorlar ishtirokida amalga oshirilishi rejalashtirilayotgan yangi investitsiya loyihalari muhokama qilindi.

Muloqotda viloyat hokimining Xitoy investitsiyalarini jalb qilish bo‘yicha maslahatchisi Chjan Chjunxua Farg‘ona viloyatida investitsiya loyihalarini amalga oshirishga qiziqish bildirayotgan yangi xitoylik biznes vakillarini jalb qilish bo‘yicha ishlar olib borilayotganini ta’kidladi.

Xususan, xitoylik investorlar avtomobillarga ehtiyot qismlar ishlab chiqarish, axborot texnologiyalari hamda qishloq xo‘jaligi sohalarida investitsiya loyihalarini amalga oshirish istagida ekani ma’lum qilindi.

Delegatsiya a’zolari ikki kun davomida Quva tumanida bo‘lib, hududning investitsiyaviy salohiyati, mavjud imkoniyatlar va loyihalarni amalga oshirish uchun yaratilgan sharoitlarni o‘rgandi. Quva tumanida xitoylik hamkorlar bilan yangi investitsiya loyihalarini amalga oshirish bo‘yicha aniq rejalar ishlab chiqilmoqda.

Shuningdek, uchrashuvda Farg‘ona tumanida amalga oshirilishi ko‘zda tutilgan investitsiya loyihalari haqida ham ma’lumot berildi.

Viloyat hokimi Xayrullo Bozorov xitoylik investorlarning tashabbuslarini qo‘llab-quvvatlashga tayyorligini bildirib, loyihalarni amalga oshirish jarayonida zarur ko‘mak va amaliy yordam ko‘rsatilishini ta’kidladi.

Uchrashuv yakunida Farg‘ona viloyati va xitoylik hamkorlar o‘rtasidagi investitsiyaviy hamkorlikni yanada jadallashtirish, yangi investorlarni jalb qilish hamda istiqbolli loyihalarni amalga oshirish bo‘yicha hamkorlikni davom ettirishga kelishib olindi.