Farg‘оnа vilоyati hоkimligi

O‘zbekiston Respublikasi Prezidentining yoqilg‘i-energetika masalalari bo‘yicha maslahatchisi Behzod Normatov, viloyat hokimi Xayrullo Bozorov Farg‘ona tumanida bo‘lib, ushbu yo‘nalishda amalga oshirilayotgan ishlar bilan tanishdi.

Tumanda elektr va gaz ta’minotini yaxshilash ishlari yangi “tumanbay” va “mahallabay” tizimi asosida tashkil etilmoqda. Maxsus shtab faoliyat ko‘rsatmoqda. Hududdagi 71 ta mahallada mavjud muammolar chuqur tahlil qilinib, ularni qisqa muddatlarda bartaraf etishga qaratilgan “Dolzarb 12 kunlik” amaliy tadbirlar yo‘lga qo‘yildi.

Mazkur jarayonga Farg‘ona davlat texnika universiteti olimlari va iqtidorli talabalari jalb etilgan bo‘lib, sohaga ilmiy yondashuv hamda innovatsion startap loyihalarini joriy etish ishlari boshlandi.

Shuningdek, “Hududgazta’minot” AJ va Farg‘ona davlat texnika universiteti o‘rtasida dual ta’lim yo‘lga qo‘yilib, 27 nafar talaba ish bilan ta’minlandi.

Amalga oshirilgan ishlar natijasida hozirga qadar 41,7 kilometr qo‘shqator gaz quvurlari demontaj qilinib, yagona uzatish tizimiga o‘tkazildi. Buning hisobiga 180 ming kub metr tabiiy gaz iqtisod qilindi. Shuningdek, eskirgan 127 ta gaz taqsimlash punkti demontaj qilinib, har oy 54 ming kub metrdan ortiq tabiiy gaz tejalishiga erishildi. 208 ta xonadon ikki bosqichli gaz ta’minoti tizimiga o‘tkazildi.

Elektr tarmoqlarini modernizatsiya qilish doirasida 71 ta transformator punkti va 37,6 kilometr elektr tarmog‘i mukammal ta’mirlandi. 84 ta elektr hisoblagichi zamonaviy ASKUE tizimiga moslashtirildi.

O‘rganishlar davomida avariya holatlarini kamaytirish, elektr va gaz hisoblagichlarini yagona axborot tizimiga ulash, energiya yo‘qotishlari hamda qarzdorlikni keskin qisqartirish bo‘yicha ishlarni yanada jadallashtirish yuzasidan mas’ullarga tegishli topshiriqlar berildi.