Xotin-qizlarni turizm sohasiga jalb etish orqali bandligini ta’minlash masalalari muhokama qilindi
2026-07-29 16:05:00 / Yangiliklar
Viloyat hokimligi, viloyat oila va xotin-qizlar boshqarmasi hamda Turizm boshqarmasi hamkorligida tashkil etilgan tadbirdan maqsad xorijdan va mehnat migratsiyasidan qaytgan xotin-qizlarni turizm sohasiga keng jalb etish, ularning iqtisodiy reintegratsiyasini ta’minlash hamda tadbirkorlik tashabbuslarini qo‘llab-quvvatlashdir.
Anjumanda mas’ul xodimlar, shahar va tumanlar hokimlari o‘rinbosarlari, Markaziy bankning viloyat boshqarmasi vakillari, turizm sohasida faoliyat yuritayotgan tadbirkorlar hamda mehnat migratsiyasidan qaytgan xotin-qizlar ishtirok etdilar.
Seminarni viloyat hokimi o‘rinbosari Xurshidjon Ahmedov ochib, xotin-qizlarning jamiyatdagi iqtisodiy faolligini oshirish, ularni zamonaviy xizmat ko‘rsatish va turizm tarmoqlarida band qilish davlat siyosatining ustuvor yo‘nalishlaridan biri ekanligini alohida ta’kidladi.
Muloqot davomida ishtirokchilarga turizm yo‘nalishida o‘z biznesini yo‘lga qo‘yish istagida bo‘lgan ayollar uchun davlat tomonidan yaratilgan imtiyozlar, subsidiya va kredit ajratish tartiblari hamda sohaning huquqiy asoslari yuzasidan batafsil tushuntirishlar berildi. Tajribali tadbirkorlar tomonidan muvaffaqiyatli biznes-keyslar taqdimot qilindi.
Oltiariq tumani Madaniyat bo‘limining “Zilola” ashula va raqs xalq ansambli qoshidagi “Baxt karvoni” jamoasi o‘zlarining dilkash kuy-qo'shiqlari bilan yig‘ilganlarga ko‘tarinki kayfiyat baxsh etdi.
Bu kabi amaliy o‘quv-seminarlar xotin-qizlarning yangi kasbiy ko‘nikmalarni egallashiga, ularning bandligini ta’minlash va oilaviy daromadlarini oshirishga xizmat qiladi.