Farg‘onada Matbuot va ommaviy axborot vositalari xodimlari kuni munosabati bilan tantanali bayram tadbiri bo‘lib o‘tdi
2026-06-24 16:05:00 / Yangiliklar
Tadbirda viloyat hokimining o‘rinbosari Sherzodjon Polvonov soha vakillarini kasb bayrami bilan samimiy tabriklab, ularning jamiyatda ochiqlik va oshkoralikni ta’minlash, xolis va tezkor axborotni aholiga yetkazish hamda viloyat ijtimoiy-iqtisodiy hayotini keng yoritishdagi munosib hissasini alohida e’tirof etdi.
Viloyat hokimi Xayrullo Bozorovning soha vakillariga yo‘llagan bayram tabrigini o‘qib eshittirdi.
Unda qayd etilganidek, bugungi kunda viloyat jurnalistikasi nafaqat mamlakatimizda, balki xalqaro maydonda ham o‘z nufuzini mustahkamlab bormoqda. Bu esa jurnalistlar, tele va radio xodimlari, axborot xizmatlari mutaxassislari hamda blogerlarning fidokorona mehnati samarasidir.
Tadbirda mamlakatimizda ochiqlik, so‘z erkinligi va jamoatchilik bilan muloqot davlat siyosati darajasiga ko‘tarilgani, ommaviy axborot vositalari davlat organlari va jamiyat o‘rtasida ishonchli ko‘prik vazifasini bajarayotgani ta’kidlandi.
Shuningdek, bugungi global axborot muhiti jurnalistika sohasi oldiga yangi vazifalarni qo‘yayotgani qayd etilib, axborot makonida xolislik va tezkorlikni ta’minlash, tahliliy jurnalistikani rivojlantirish, sun’iy intellekt imkoniyatlaridan samarali foydalanish, yosh jurnalistlarni qo‘llab-quvvatlash, milliy kontentlar ulushini oshirish kabi muhim yo‘nalishlarga alohida e’tibor qaratish zarurligi qayd etildi.
Viloyatda media sohasini rivojlantirish borasida amalga oshirilayotgan ishlar ham e’tirof etildi. Jumladan, viloyat hokimligi muassisligidagi “Yangi Farg‘ona” gazetasi huzurida media markaz tashkil etilgani, “Farg‘ona”, “Ruxsor”, “Muloqot” telekanallari va radiolarida dolzarb mavzulardagi ko‘rsatuv va eshittirishlar tayyorlanayotgani, shuningdek, internet nashrlari va axborot platformalarining faolligi tobora ortib borayotgani ta’kidlandi.
Tadbir davomida matbuot sohasida ko‘p yillik samarali mehnati, jamiyat hayotidagi faol ishtiroki va kasbiy mahorati bilan ajralib turgan bir guruh soha vakillari viloyat hokimining faxriy yorlig‘i hamda esdalik sovg‘alari bilan taqdirlandi.
Bayram tadbiri el sevgan xonandalar ijrosidagi kuy-qo‘shiqlar, raqs jamoalarining chiqishlari bilan davom etib, ishtirokchilarga ko‘tarinki kayfiyat ulashdi.