Shuningdek, sessiyada Hisob palatasining Farg‘ona viloyati bo‘yicha vakili Bahodir Bozarov ham qatnashdi.

Hududlarni ijtimoiy-iqtisodiy rivojlantirish, shuningdek, aholini turmush tarzini yanada yaxshilashga oid 14 ta muhim masalalar kun tartibidan o‘rin oldi.

Dastlab Hisob palatasi tomonidan Farg‘ona viloyati mahalliy budjetining 2025-yildagi ijrosi to‘g‘risidagi hisoboti tashqi audit va baholashdan o‘tkazilib, tegishli xulosa berilgani ma’lum qilindi. Prezidentimizning tegishli farmoni talablaridan kelib chiqib, mazkur xulosalar bilan deputatlar tanishtirib o‘tildi.

Shuningdek, fuqarolarning huquq va manfaatlarini inobatga olib, o‘zboshimchalik bilan egallab olingan yer uchastkalariga hamda ularda qurilgan binolar va inshootlarga bo‘lgan huquqlarni e’tirof etish yuzasidan viloyat Adliya boshqarmasining tegishli xulosalari, amalga oshirilgan ishlar haqida ma’lumot berildi.

Viloyat iqtisodiyot va moliya bosh boshqarmasi boshlig‘i birinchi o‘rinbosari Zafarjon Ro‘zaliyev ham kun tartibidagi masalalar bo‘yicha hisobotlarini taqdim etdi.

Shundan so‘ng yana qator masalalar deputatlar ishtirokida ko‘rib chiqildi va muhokamalar o‘tkazilib, tegishli qarorlar qabul qilindi.