Janubiy Koreyaning nufuzli universiteti bilan qo‘shma ta’lim dasturlari amalga oshiriladi
2026-06-10 12:55:00 / Yangiliklar
Muloqotda o‘tgan yili viloyat hokimi boshchiligidagi delegatsiyaning Janubiy Koreyaga amalga oshirgan tashrifi chog‘ida erishilgan kelishuvlarni amaliy bosqichga olib chiqish, oliy ta’lim muassasalari o‘rtasidagi hamkorlikni kengaytirish, malakali va raqobatbardosh kadrlar tayyorlash masalalari muhokama qilindi.
Uchrashuvda Farg‘ona davlat texnika universiteti va Qo‘qon universiteti bilan sun’iy intellekt hamda axborot texnologiyalari sohasida qo‘shma ta’lim dasturlarini yo‘lga qo‘yish, maktab bitiruvchilarini oliy ta’limga yo‘naltirish istiqbollariga alohida e’tibor qaratildi.
Sanoat va ilm-fan integratsiyasini Koreyaning ilg‘or tajribasi asosida mustahkamlash, “IT Park” Farg‘ona viloyati filiali bilan amaliy hamkorlikni rivojlantirish, sanoat korxonalari uchun raqamli texnologiyalar va sun’iy intellekt yo‘nalishlarida yuqori malakali mahalliy mutaxassislar tayyorlash yuzasidan fikr almashildi.
Uchrashuv davomida 16–18-iyun kunlari bo‘lib o‘tadigan V Toshkent xalqaro investitsiya forumi doirasida Farg‘ona viloyatida bo‘lib turgan investorlar tomonidan qator tashabbuslar ilgari surildi. Xususan, investitsiyalarni jalb qilish, ta’lim va sport sohalarida hamkorlikni kengaytirish, startap loyihalarni qo‘llab-quvvatlash hamda iqtidorli talabalar uchun grant dasturlarini yo‘lga qo‘yish, biznes muhitini rivojlantirishda dual ta’limdan samarali foydalanish masalalari muhokama qilindi.
Bundan tashqari, lift ishlab chiqarishni tashkil etish, mahalliy tadbirkorlarni O‘zbekiston—Koreya biznes uyushmasi faoliyatiga jalb qilish, shuningdek, “Neftchi” futbol klubi bilan Janubiy Koreya klublari o‘rtasida hamkorlik aloqalarini yo‘lga qo‘yish bo‘yicha takliflar ko‘rib chiqildi.
Viloyat rahbari bildirilgan tashabbus va takliflarni qo‘llab-quvvatlashini ta’kidlab, hamkorlik jarayonlarida faol ishtirok etib kelayotgan “AHA Co., Ltd” kompaniyasi rahbari Ku Gi Doga alohida minnatdorlik bildirdi.
Uchrashuv yakunida SeoulTech universiteti, Farg‘ona davlat texnika universiteti hamda “IT Park” Farg‘ona viloyati filiali o‘rtasida anglashuv memorandumi imzolandi.
Koreya kompaniyasi rahbari Ku Gi Doga Farg‘ona viloyati hokimining sun’iy intellekt va raqamlashtirish texnologiyalarini jalb qilish masalalari bo‘yicha maxsus maslahatchisi guvohnomasi topshirildi.