Farg‘ona viloyatida kimyo sanoatini rivojlantirish bo‘yicha yangi loyihalar ishlab chiqilmoqda
2026-06-04 20:20:00 / Yangiliklar
Yig‘ilishda sohani yangi bosqichga olib chiqish bo‘yicha aniq vazifalar belgilab berildi.
Ushbu topshiriqlar ijrosini ta’minlash maqsadida bugun Farg‘ona viloyati hokimi Xayrullo Bozorov hamda mutasaddi rahbarlar “Chirchiq” kimyo-industrial texnoparkida bo‘lib, u yerdagi korxonalar faoliyati bilan yaqindan tanishdi.
Bugungi kunda “Chirchiq” kimyo-industrial texnoparki mamlakatimiz kimyo sanoatidagi yangi avlod sanoat maydonlaridan biri sifatida shakllanib ulgurgan. Davlatimiz rahbarining 2022-yil 3-fevraldagi qarori asosida tashkil etilgan mazkur texnopark kimyo mahsulotlarini chuqur qayta ishlash, yuqori qo‘shilgan qiymatli mahsulotlar ishlab chiqarish, ilg‘or texnologiyalarni joriy etish va mahalliy hamda xorijiy investorlar uchun qulay biznes muhitini yaratishga xizmat qilmoqda.
Umumiy maydoni 26,4 gektarni tashkil etuvchi texnopark hududida muhandislik-kommunikatsiya tarmoqlari va zamonaviy infratuzilmani barpo etish uchun 25 million dollar mablag‘ yo‘naltirilgan.
Texnoparkning iqtisodiy samaradorligi ham yuqori sur’atlarda o‘smoqda. Xususan, 2025-yil davomida 56 million dollarlik investitsiyalar o‘zlashtirilib, 758 ta yangi ish o‘rni yaratildi. Korxonalar tomonidan 150 dan ortiq turdagi mahsulot ishlab chiqarilib, ularning umumiy qiymati 60 million dollardan oshdi.
Kelgusida texnoparkni yanada kengaytirish va uni mamlakat kimyo sanoatining muhim drayverlaridan biriga aylantirish rejalashtirilgan. Jumladan, 2030-yilga qadar investitsiyalar hajmini 207 million dollarga, tovar mahsulotlari ishlab chiqarish hajmini 294 million dollarga, eksport ko‘rsatkichlarini 48 million dollarga yetkazish hamda yaratiladigan ish o‘rinlari sonini 2 ming 300 taga oshirish maqsad qilingan.
Texnopark tajribasini o‘rganish asosida viloyatda kimyo sanoatida yangi istiqbolli loyihalarni amalga oshirish, yuqori qo‘shilgan qiymatga ega mahsulotlar ishlab chiqarish choralari belgilandi.