“Yangi O‘zbekiston — yangicha ta’lim” respublika o‘quv-seminari: ta’lim islohotlari va mazkur yo‘nalishdagi “Farg‘ona tajribasi” e’tirof etildi
2026-05-16 12:35:00 / Yangiliklar
Maktabgacha va maktab ta’limi vazirligi Hay’at yig‘ilishi bugun Farg‘ona shahridagi “Farg‘ona ekspo” xalqaro ko‘rgazmalar majmuasida bo‘lib o‘tdi.
Unda viloyat hokimi Xayrullo Bozorov, Maktabgacha va maktab ta’limi vaziri E’zoza Karimova, vazir o‘rinbosarlari, hududiy boshqarmalar, tuman va shahar bo‘limlari, tizim tashkilotlari rahbarlari hamda Respublika “Kelajak markazi” mas’ul xodimlari ishtirok etdi.
Tadbirda viloyat hokimi Xayrullo Bozorov so‘z olib, seminar ishtirokchilarini muhim anjuman bilan qutladi. Ushbu seminar ta’lim sohasida amalga oshirilayotgan islohotlarni chuqur tahlil qilish, ilg‘or tajribalarni ommalashtirish va istiqboldagi ustuvor vazifalarni belgilab olishda muhim ahamiyat kasb etishini ta’kidladi.
Viloyat rahbari keyingi yillarda Prezidentimiz tashabbuslari natijasida ta’lim tizimida amalga oshirilayotgan tub o‘zgarishlar, zamonaviy va ilg‘or xorijiy tajribalar asosida joriy etilayotgan yangilanishlarga to‘xtalib, Yangi O‘zbekistonni barpo etadigan bilimli, raqobatbardosh va zamonaviy fikrlaydigan yosh avlodni tarbiyalash ustuvor vazifa ekanini qayd etdi.
Shuningdek, Uchinchi Renessans poydevorini mustahkamlash, ajdodlarga munosib avlodni tarbiyalash yo‘lida ta’lim sohasiga qaratilayotgan yuksak e’tibor va investitsiyalar mamlakat kelajagi uchun muhim omil bo‘layotganini alohida ta’kidladi.
Yig‘ilishda Maktabgacha va maktab ta’limi vaziri E’zoza Karimova ham so‘zga chiqib, sohada amalga oshirilayotgan islohotlar samarasi, kelgusidagi ustuvor vazifalar hamda hududlardagi rahbar kadrlar mas’uliyati haqida to‘xtaldi. Shu bilan birga, Farg‘ona viloyati ta’lim tizimida qo‘lga kiritilayotgan ijobiy natijalar yuqori baholanib, “Farg‘ona tajribasi”ni respublika miqyosida ommalashtirish zarurligi qayd etildi.
Tadbir davomida ta’lim sohasi rivojiga qo‘shgan munosib hissasi uchun viloyat hokimi Xayrullo Bozorovga vazirlikning “Xalq ta’lim fidoyisi” ko‘krak nishoni topshirildi. Shuningdek, Farg‘ona shahri, Dang‘ara va Oltiariq tumanlari hokimlari “Ta’lim homiysi” ko‘krak nishonlari bilan taqdirlandi.
Yig‘ilishda joriy o‘quv yilini samarali yakunlash, “So‘nggi qo‘ng‘iroq” tadbirlarini yuqori saviyada tashkil etish masalalari ham muhokama qilindi. Mas’ullarning hisobotlari tinglanib, belgilangan vazifalar ijrosini tizimli ta’minlash yuzasidan tegishli tavsiyalar berildi.