Farg‘ona tumanida 5 ming gektar ekin yer maydonlarini suv bilan ta’minlashga xizmat qiladigan “Avval-Log‘on” nasos stansiyasi foydalanishga topshirildi
2026-04-21 19:25:00 / Yangiliklar
Mazkur yirik infratuzilma obyekti Jahon banki moliyaviy ko‘magida amalga oshirilayotgan “Farg‘ona vodiysida suv resurslarini boshqarish” loyihasining ikkinchi bosqichi doirasida Xitoy qurilish kompaniyasi tomonidan barpo etildi.
Loyiha doirasida qariyb 30 million dollar miqdoridagi investitsiya mablag‘lari hisobidan nasos stansiyasi uchun zamonaviy talablarga javob beradigan bino va inshootlar qurildi.
Jumladan, diametri 1220 millimetr bo‘lgan, umumiy uzunligi 9,3 kilometrlik yuqori bosimli quvurlar yotqizildi. Shuningdek, shu masofaga teng bo‘lgan 110 kilovoltli yuqori kuchlanishli elektr tarmoqlari ham tortildi.
Inshoot 3 ta zamonaviy nasos agregati va yuqori quvvatli elektr dvigatellar bilan jihozlangan bo‘lib, ularni boshqarish jarayoni to‘liq avtomatlashtirilgan. Bu esa inson omilini kamaytirish, tizimning barqaror va samarali ishlashini ta’minlash imkonini beradi.
Nasos stansiyasi “Marg‘ilonsoy” kanalidan suv olib, uni 9,3 kilometr masofaga “Log‘on” kanaliga uzatadi. Suv uzatish quvvati soniyasiga 2 kub metrni tashkil etib, natijada qariyb 5 ming gektar ekin yerlarining suv ta’minoti sezilarli darajada yaxshilanadi.
Tadbir davomida ishtirokchilar yangi nasos stansiyasining texnik imkoniyatlari, zamonaviy uskunalari va avtomatlashtirilgan boshqaruv tizimi bilan yaqindan tanishdilar.