Poytaxtimizda oltinchi bor o‘tkazilayotgan “INNOPROM. Markaziy Osiyo” xalqaro sanoat ko‘rgazmasi o‘z ishini boshladi
2026-04-20 14:45:00 / Yangiliklar
Hududning nufuzli sanoat maydonlaridan biri sifatida e’tirof etilayotgan mazkur yirik tadbirda O‘zbekiston, Rossiya, Qozog‘iston, Qirg‘iziston, Tojikiston, Belarus, Turkiya, Xitoy hamda boshqa davlatlardan davlat idoralari vakillari, investorlar, yirik ishlab chiqaruvchi kompaniyalar rahbarlari va mutaxassislar ishtirok etmoqda.
Viloyat hokimi Xayrullo Bozorov boshchiligidagi delegatsiya ham mazkur yirik xalqaro ko‘rgazmada qatnashayotgan bo‘lib, uning doirasida qator uchrashuvlar o‘tkazish rejalashtirilgan.
Joriy yilgi ko‘rgazma sanoatning turli tarmoqlari uchun mo‘ljallangan zamonaviy texnologiya va innovatsion ishlanmalarning keng qamrovi bilan ajralib turadi. Unda shahar muhiti va transport tizimlarini rivojlantirishga qaratilgan yechimlardan tortib, yuqori texnologik sanoat uskunalari, ishlab chiqarish jarayonlarini avtomatlashtirish hamda raqamlashtirishga oid ilg‘or ishlanmalar namoyish etilmoqda.