Farg‘ona viloyatida o‘tkazilayotgan “Markaziy Osiyo davlatlari va Ozarbayjon” do‘stlik forumi doirasida “Markaziy Osiyo davlatlari va Ozarbayjon do‘stligining yangi davri” mavzusida xalqaro konferensiya bo‘lib o‘tdi
2026-03-31 13:05:00 / Yangiliklar
Konferensiyada so‘zga chiqqan viloyat hokimi Xayrullo Bozorov ishtirokchilarni nufuzli anjuman bilan samimiy qutlab, mazkur forum xalqlar o‘rtasidagi azaliy do‘stlik rishtalarini mustahkamlash, millatlararo totuvlikni ta’minlash va madaniy-gumanitar aloqalarni kengaytirishda muhim ahamiyat kasb etishini ta’kidladi.
Qayd etilganidek, bugungi kunda O‘zbekiston Respublikasi Prezidenti Shavkat Mirziyoyev rahbarligida amalga oshirilayotgan ochiq va pragmatik tashqi siyosat natijasida Markaziy Osiyo mintaqasida o‘zaro ishonch va yaxshi qo‘shnichilik muhiti mustahkamlanmoqda. Xususan, Markaziy Osiyo davlatlari rahbarlarining Maslahat uchrashuvlari mintaqadagi hamkorlikni yangi sifat bosqichiga olib chiqishda muhim o‘rin tutmoqda.
O‘zbekiston va Ozarbayjon o‘rtasidagi munosabatlar bugungi kunda strategik sheriklikning yuqori darajasiga ko‘tarilgan bo‘lib, davlat rahbarlari o‘rtasidagi o‘zaro ishonch va yaqin muloqot ushbu hamkorlikning mustahkam poydevorini tashkil etmoqda. Savdo-iqtisodiy, madaniy-gumanitar va hududlararo aloqalar izchil rivojlanmoqda.
Shuningdek, Toshkent shahrida Haydar Aliyev nomidagi xiyobon barpo etilgani, “Ozarbayjon bog‘i”ning tashkil etilayotgani, Boku shahrida “O‘zbekiston bog‘i” hamda Fuzuliy shahrida Mirzo Ulug‘bek nomidagi zamonaviy maktabning barpo etilgani ikki xalq o‘rtasidagi do‘stlik va qardoshlik munosabatlarining yorqin ifodasi sifatida qayd etildi.
Tadbirda so‘z olgan ishtirokchilar — O‘zbekiston Respublikasi Millatlararo munosabatlar va xorijdagi vatandoshlar masalalari bo‘yicha qo‘mita raisi Qahramon Sariyev, Qirg‘iz Respublikasi mehnat, ijtimoiy ta’minot va migratsiya vaziri birinchi o‘rinbosari Kamchibek Dosmatov, Tojikistonning do‘stlik va madaniy aloqalar jamiyati vakili Ibrohim Abdullazoda, Ozarbayjon Respublikasining Diaspora bo‘yicha Davlat qo‘mitasi raisi birinchi o‘rinbosari Valex Gajiyev, Qozog‘iston Respublikasi "Otandastar fondi" AJ vise prezidenti Alibek Jurkadam, shuningdek, boshqa rasmiylar va ekspertlar mintaqada o‘zaro ishonch, yaxshi qo‘shnichilik va amaliy hamkorlikni yanada chuqurlashtirish borasida olib borilayotgan muhim jihatlarga e’tibor qaratdilar. Markaziy Osiyo va Ozarbayjon o‘rtasidagi do‘stlik aloqalarining tarixiy ildizlari, bugungi kundagi samarali hamkorlik yo‘nalishlari hamda istiqboldagi ustuvor vazifalar haqida atroflicha fikr bildirdilar.
Anjuman davomida mazkur muloqot maydonini doimiy platformaga aylantirish, Farg‘onada barqaror taraqqiyotni ta’minlashga qaratilgan qo‘shma tashabbus va dasturlarni ilgari surish bo‘yicha kelishuvlarga erishildi.
Tadbir doirasida bir qator faol ishtirokchilar “Xalqlar do‘stligi” ko‘krak nishoni bilan taqdirlandi.
Mazkur ilmiy konferensiya mintaqa davlatlari o‘rtasidagi ko‘p asrlik tarixiy aloqalar, umumiy qadriyatlar hamda bugungi kunda shakllanayotgan yangi bosqichdagi hamkorlik masalalarini atroflicha muhokama qilish uchun muhim platforma vazifasini o‘tadi.