Bugun Farg‘ona jamoat salomatligi tibbiyot institutining zamonaviy ko‘p tarmoqli klinikasi — “Aqlli shifoxona” faoliyat boshladi
2026-03-28 12:35:00 / Yangiliklar
Tadbirda so‘zga olganlar mamlakatimiz rahbari tashabbusi bilan sog‘liqni saqlash tizimida amalga oshirilayotgan keng ko‘lamli islohotlar natijasida tibbiy xizmatlar sifati sezilarli darajada yaxshilanganini ta’kidladilar. Xususan, tibbiyot muassasalari sonining ortishi, ularning zamonaviy uskunalar bilan jihozlanishi hamda moddiy-texnik bazasining mustahkamlanishi aholiga ko‘rsatilayotgan xizmat darajasini yangi bosqichga olib chiqmoqda.
Shuningdek, so‘nggi yillarda hududlar aholisining tibbiy xizmat olish uchun poytaxt yoki xorijga murojaat qilish holatlari keskin kamaygani alohida qayd etildi. Yangi klinika faoliyati ham aynan shu maqsadlarga xizmat qilishiga ishonch bildirildi.
Mazkur muassasa 50 milliard so‘m investisiya hisobiga barpo etilgan bo‘lib, 120 o‘rinli stasionar hamda kuniga 200 nafargacha bemorni qabul qilish imkoniyatiga ega ambulator bo‘limlardan iborat. Klinikada umumiy terapiya, umumiy xirurgiya, anesteziologiya va reanimatsiya, qabul-diagnostika hamda fizioterapiya yo‘nalishlari bo‘yicha xizmat ko‘rsatiladi.
Klinikaning yana bir muhim jihati — uning to‘liq raqamlashtirilgan “smart” texnologiyalar asosida tashkil etilganidir. Bu esa ortiqcha qog‘ozbozlikni bartaraf etib, tibbiy xizmat ko‘rsatish tezligi va samaradorligini oshirishga xizmat qiladi.
Ayni paytda, ushbu maskan nafaqat davolash muassasasi, balki tibbiyot kadrlarini tayyorlashda ham muhim ahamiyat kasb etadi. Institutning minglab talabalari bu yerda zamonaviy bilim va ko‘nikmalarini mustahkamlaydilar.
Yangi klinika hududda yuqori texnologiyali tibbiy xizmatlar ko‘lamini yanada kengaytirib, murakkab jarrohlik amaliyotlarini joyida bajarish imkoniyatini yaratadi.
Tadbir davomida ramziy tasma qirqilib, mehmonlar zamonaviy tibbiyot yutuqlarini o‘zida mujassam etgan klinika faoliyati bilan yaqindan tanishdilar.