Farg‘onada Navro‘z bayrami ko‘tarinki ruh, milliy an’analar va qadriyatlarga mos tarzda keng nishonlanmoqda
2026-03-21 14:40:00 / Yangiliklar
Tantanada shahar va tumanlardan kelgan jamoatchilik vakillari, milliy madaniy markazlar, turli korxona va tashkilotlar, muassasa va mahallalar faollari, yurtimiz taraqqiyotiga munosib hissa qo‘shayotgan fidoyi insonlar, mehnat faxriylari, iqtidorli yoshlar, keng jamoatchilik hamda xorijlik mehmonlar ishtirok etdi.
Tadbir avvalida mehmonlar viloyatning o‘ziga xos qiyofasini aks ettirgan bayram dekoratsiyalari, milliy hunarmandchilik namunalari va bahoriy taomlar ko‘rgazmalari bilan tanishdilar. Shuningdek, dor o‘yinlari, sportchilar chiqishlari va teatr jamoalarining jonli tomoshalari tadbirga alohida ruh bag‘ishladi.
Tantanali tadbirda viloyat hokimi Xayrullo Bozorov ishtirokchilarni Ramazon hayiti va Navro‘z bayrami bilan samimiy qutlab, mamlakatimizda amalga oshirilayotgan islohotlarda inson qadri va manfaatlari ustuvor o‘rin tutayotganini ta’kidladi. Shu bilan birga, yurtimiz ma’naviy hayotidagi muhim voqealar sifatida O‘zbekistondagi Islom sivilizatsiyasi markazi hamda Imom Buxoriy majmuasining barpo etilishi alohida qayd etildi.
Tadbirda 2026-yilda viloyatni ijtimoiy-iqtisodiy rivojlantirish bo‘yicha ustuvor vazifalarga ham to‘xtalib o‘tildi. Xususan, 4,2 milliard dollarlik xorijiy investitsiyalarni o‘zlashtirish, eksport hajmini 2 milliard dollarga yetkazish rejalashtirilgani ma’lum qilindi.
Shuningdek, yurtimizda 2026-yil “Mahallani rivojlantirish va jamiyatni yuksaltirish yili” deb e’lon qilingani munosabati bilan mahalla tizimini yanada takomillashtirish, aholi uchun obod va farovon muhit yaratish ustuvor vazifalardan biri sifatida belgilangani ta’kidlandi. “Mahalla tizimi xodimlari kuni” munosabati bilan mahalla raislari, faollar va “yettilik” a’zolari ham e’tirof etilib, kasb bayramlari bilan qutlandi.
Tadbirda Qirg‘iz Respublikasi Prezidentining Batken viloyatidagi vakolatli vakili o‘rinbosari Abdirashit Tashbaltayev ham so‘zga chiqib, butun xalqimizni, jumladan barcha farg‘onaliklarni Navro‘z ayyomi bilan samimiy qutladi.
Tantanali tadbirlar viloyat badiiy jamoalari, yosh ijrochilar hamda respublikamiz san’at ustalari ishtirokidagi teatrlashtirilgan konsert dasturlari bilan yanada fayzli va unutilmas tus oldi. O‘zbekiston xalq artisti Gulsanam Mamazoitova, O‘zbekiston xalq hofizi Ilhom Ibrohimov, O‘zbekistonda xizmat ko‘rsatgan artislar Alisher Fayz, Abdulhay Karimov, elimiz suygan xonandalar Qilichbek Madaliyev, Jo‘rabek Qodirovlar ijrosidagi kuy-qo‘shiqlar ishtirokchilarga yuqori kayfiyat bag‘ishladi.
Navro‘z shodiyonalari viloyatning barcha hududlarida davom etmoqda, xalqimizning birdamligi, mehr-oqibati va yangilanishga bo‘lgan intilishini yana bir bor namoyon etmoqda.