Viloyat hokimi Xayrullo Bozorov “CLAAS” kompaniyasining Yevrosiyo bo‘yicha O‘zbekiston va Qirg‘izistondagi boshqaruvchisi Folker Gunter Syettl hamda kompaniyaning mahalliy mas’ul vakillarini qabul qildi
2026-03-17 13:55:00 / Yangiliklar
iloyat hokimi Xayrullo Bozorov mamlakatimizda so‘nggi yillarda qishloq xo‘jaligida islohotlarni alohida e’tirof etib, zamonaviy texnologiyalar va texnikalar keng tadbiq etilayotganini ta’kidladi. Bu borada CLAAS kompaniyasining o‘rni muhim ekanligini ta’kidlab, mazkur kompaniya tomonidan ishlab chiqarilayotgan zamonaviy va ishonchli texnika vositalari fermer xo‘jaliklari samaradorligini oshirishda muhim omil bo‘layotganini qayd etdi. Shuningdek, ushbu texnikalarning O‘zbekiston bozorida o‘z o‘rniga ega ekani e’tirof etildi.
Muloqot davomida qishloq xo‘jaligi texnikalarini, jumladan, DOMINATOR rusumli g‘alla o‘rish kombaynlari va traktorlarni yanada takomillashtirish, ularni raqamlashtirish va intellektual boshqaruv elementlari bilan jihozlash bo‘yicha olib borilayotgan ishlar taqdimot qilindi.
Shuningdek, viloyatimizda sohada malakali kadrlarni tayyorlash maqsadida mintaqaviy o‘quv markazini tashkil etish, dual ta’lim tizimini joriy etish, servis xizmatlarini kengaytirish hamda texnikalardan samarali foydalanishni ta’minlash yuzasidan ham fikr almashildi.
O‘zaro manfaatli hamkorlikni yanada jadallashtirish, qishloq xo‘jaligi tarmog‘ini zamonaviy texnologiyalar asosida rivojlantirish bo‘yicha qo‘shma loyihalarni amalga oshirishga kelishib olindi.
Ma’lumot uchun, CLAAS — Germaniyada joylashgan yirik sanoat kompaniyasi bo‘lib, dunyodagi yetakchi qishloq xo‘jaligi texnikasi ishlab chiqaruvchilaridan biri hisoblanadi. Kompaniya yuqori samaradorlikka ega kombaynlar va zamonaviy agrotexnika vositalari ishlab chiqarishi bilan mashhur.