Farg‘оnа vilоyati hоkimligi

Tadbirda viloyat hokimi Xayrullo Bozorov, viloyat qishloq xo‘jaligi sohasi mutasaddilari, tuman hokimlari, mas’ul rahbarlar, paxta-to‘qimachilik va g‘allachilik klasterlari rahbarlari, fermerlar, sohada faoliyat yuritayotgan mutaxassislar hamda jamoatchilik kengashi a’zolari ishtirok etdi.

Dastlab ishtirokchilarga chigit ekish va g‘alla parvarishida qo‘llanilayotgan ilg‘or agrotexnologiyalar, zamonaviy o‘g‘itlash vositalari, dala chetlaridan samarali foydalanish imkoniyatlari, suv tejovchi qurilmalar, quyosh panellari haqida ma’lumot berildi.

Nuroniylar ishtirokida duolar qilinib, ezgu niyatlar bilan yerga chigit qadash ishlariga kirishildi.

Seminarda so‘z olgan viloyat hokimi Xayrullo Bozorov qishloq xo‘jaligi sohasida ilm va amaliyot uyg‘unligi yangi bosqichga ko‘tarilgani, bu esa o‘z navbatida katta samaralar berayotganligini ta’kidladi.

Xorijiy navlar, qo‘shqator ekish usuli, tomchilatib sug‘orish va dronlar yordamidagi agroishlovlar natijasida hosildorlik keskin oshganligi aytib o‘tildi. O‘tgan yilda agrar tizimda erishilgan natijalarga to‘xtalib, mavjud yutuqlar, yo‘l qo‘yilgan xato va kamchiliklar tahlil etildi, joriy yilda amalga oshirilishi lozim bo‘lgan muhim ishlarga e’tibor qaratildi.

Qayd etilganidek, joriy yilda viloyatda 72 ming gektar maydonga chigit ekish rejalashtirilgan. Ayni paytda 92 ming 300 gektar maydonda g‘alla parvarishlanmoqda.

Viloyat hokimi ishlarni tizimli yo‘lga qo‘yish, chigit ekish mavsumida shtablar faoliyatini samarali tashkil etish masalalariga to‘xtalib o‘tdi.

Sohada marrani baland olish, ezgu niyatlar bilan katta maqsadlarni belgilash, fermer xo‘jaliklari manfaatdorlik asosida ish yuritib, paxta hosildorligini gektaridan kamida 60–70 sentnerga yetkazish zarurligi ta’kidlandi.

Joriy yilda viloyatda chigit ekish ishlari to‘liq 76 santimetrli sxema asosida amalga oshiriladi. Shundan 62,5 ming gektar maydonga xorijiy navlar, 9,5 ming gektar maydonga esa mahalliy navlar joylashtiriladi.

Seminar davomida chigit ekish mavsumida amalga oshiriladigan agrotexnik tadbirlar, moddiy-texnik resurslar zaxirasini ta’minlash ishlari ham muhokama qilindi.

Chigit ekish jarayonlarini tizimli tashkil etish maqsadida viloyatda 257 ta maxsus otryad tuzilgan bo‘lib, ularga 4149 ta texnika va mexanizm biriktirilgan.

Viloyat hokimi qishloq xo‘jaligida yuqori natijalarga erishish zamonaviy texnologiyalar va ilm-fan yutuqlarini keng joriy etish, xorij tajribasini muvaffaqiyatli qo‘llash bilan bevosita bog‘liq ekanini ta’kidladi. Shuningdek, o‘g‘itlash va boshqa agrotexnik tadbirlarni o‘z vaqtida amalga oshirish orqali yuqori hosildorlikka erishish mumkinligi qayd etildi.

Tadbir davomida g‘alla parvarishi, oziqlantirish ishlarini tizimli va sifatli tashkil etish borasidagi ilg‘or tajribalar bilan tanishildi. Ilk chilgi hosil-ipak qurtini boqish bo‘yicha ham mutaxassislar tomonidan ma’lumot berildi.

Shu bilan birga, kartoshka ekish, bog‘ qator oralaridan samarali foydalanish  chora-tadbirlari ham tushuntirildi. Dala chetlaridan unumli foydalanish, dala madaniyatiga qat’iy amal qilish zarurligi uqtirildi.

Seminar yakunida bahorgi ishlar bo‘yicha oldinda turgan vazifalar yuzasidan mutasaddilarga tegishli topshiriq va ko‘rsatmalar berildi.