Farg‘оnа vilоyati hоkimligi

Tantanali tadbirda viloyat hokimining o‘rinbosari Burxon Qo‘ldoshev viloyat hokimining farg‘onalik xotin-qizlarga yo‘llagan bayram tabrigini o‘qib eshittirdi.

Tabrikda hayotimiz quvonchi, xonadonlarimiz fayzi bo‘lgan moʻtabar va munis ayollarimiz samimiy qutlanib, ezgu tilaklar bildirildi.

Qayd etilganidek, Yangi O‘zbekistonda Prezidentimiz tashabbuslari bilan xotin-qizlarning jamiyatdagi o‘rni mutlaqo yangi bosqichga ko‘tarildi. Bugungi ayol nafaqat oila bekasi, balki faol siyosatchi, mohir tadbirkor, yetuk olima va eng muhimi – kelajak avlodni tarbiyalovchi oqila murabbiy sifatida e’tirof etilmoqda.

Viloyatimizda xotin-qizlarning oliy ta’lim olishi, zamonaviy IT texnologiyalarini egallashi hamda turli rahbarlik lavozimlarida faoliyat yuritishi uchun keng imkoniyatlar yaratilgan.

“Bir ayolni o‘qitsak, butun bir avlodni ma’rifatli qilamiz”, degan ezgu tamoyil amalda o‘z ifodasini topmoqda.

E’tiborlisi, so‘nggi yillarda xotin-qizlarning iqtisodiy, ijtimoiy-siyosiy faolligi sezilarli darajada oshdi. Xususan, viloyatimizda 2022-yilga nisbatan faol xotin-qizlar soni ikki barobarga ko‘paydi. Bugungi kunda rahbar ayollar soni 2 ming 700 nafardan oshib, 2022-yildagi 526 nafar ko‘rsatkichga nisbatan bir necha barobar o‘sishga erishildi.

2025-yil holatiga ko‘ra, oliy ta’limda tahsil olayotgan xotin-qizlar ulushi 53,5 foizni tashkil etmoqda. Shuningdek, 750 nafar ehtiyojmand xotin-qizning to‘lov-kontrakt mablag‘lari qoplab berildi. “Ayollar daftari” asosida xotin-qizlarni ijtimoiy qo‘llab-quvvatlash izchil davom ettirilmoqda.

Kuni kecha qabul qilingan “8-mart – Xalqaro xotin-qizlar kuni munosabati bilan mukofotlash to‘g‘risida”gi Prezident farmoniga muvofiq, bir guruh faol farg‘onalik ayollar ham davlatimizning yuksak mukofotlariga, shuningdek, Dilafruzxon Jo‘raboyeva va Dilafruzxon Sobirova Zulfiya nomidagi Davlat mukofotiga sazovor bo‘ldilar.

Tadbir davomida mukofot sohibalari yana bir bor muborakbod etildi.

Taqdirlanganlarga davlat mukofotlari,  bir guruh xotin-qizlarga "Mo‘tabar ayol" ko‘krak nishonlari, viloyat hokimligining faxriy yorliq va esdalik sovg‘alari topshirildi.

Bayram tadbiri el ardog‘idagi san’atkorlar ishtirokidagi konsert dasturi bilan davom etdi, yig‘ilganlarga ko‘tarinki kayfiyat va unutilmas taassurotlar ulashildi.