“Farg‘ona atirguli” tanlovi g‘oliblari taqdirlandi
2026-03-03 19:40:00 / Yangiliklar
Farg‘ona viloyati axborot-kutubxona markazida O‘zbekiston Jurnalistlar uyushmasi Farg‘ona viloyat bo‘limi tashabbusi bilan o‘tkazilgan “Farg‘ona atirguli-2026” tanlovining tantanali taqdirlash marosimi bo‘lib o‘tdi.
Viloyat hokimi o‘rinbosari Xurshidjon Ahmedov tadbir qatnashchilarini, xususan, viloyatimizdagi barcha jurnalist opa-singillarni 8-mart — Xalqaro xotin-qizlar kuni bilan samimiy muborakbod etdi. Ayol jurnalistlarning fidokorona mehnati, dolzarb mavzularni dadil ko‘tarayotgani va jamiyatdagi ijtimoiy faolligi alohida e’tirof etildi.
Tadbirda O‘zbekiston jurnalistika va ommaviy kommunikatsiyalar universiteti rektori Sherzodxon Qudratxo‘ja, Jurnalistlar uyushmasi viloyat bo‘limi raisi Muhammadjon Obidov va boshqalar jurnalistika rivoji, kasb mas’uliyati va unda ayollarning samarali faoliyati xususida so‘z yuritdilar. Ularning so‘zlarida bir jihat alohida urg‘ulandi: jurnalistika — bu shunchaki kasb emas, bu jamiyat oldidagi burchdir.
O‘zbekiston Jurnalistlar uyushmasi safiga qabul qilingan yosh jurnalistlarga a’zolik guvohnomalari topshirildi.
Tanlovda Andijon, Namangan va Farg‘ona viloyatlaridan jami 32 nafar jurnalist ishtirok etdi. Ularning ijodiy ishlari, ijtimoiy-siyosiy mavzulardagi chiqishlari, inson qadrini ulug‘lovchi materiallari hakamlar hay’ati tomonidan sinchiklab o‘rganildi.
Yakunda g‘olib va sovrindorlarga statuetka, diplom, esdalik nishonlari hamda bayram tuhfalari tantanali topshirildi. Tadbirga videokonferensaloqa orqali O‘zbekistonning Yaponiyadagi Favqulodda va muxtor elchisi Muhsinxo‘ja Abdurahmonov hamda yozuvchi, jurnalist, filologiya fanlari doktori, O‘zbekistonda xizmat ko‘rsatgan madaniyat xodimi Xurshid Do‘stmuhammad farg‘onalik jurnalist ayollarni samimiy qutladilar.