Farg‘оnа vilоyati hоkimligi

Viloyat hokimligi, Veterinariya va chorvachilikni rivojlantirish qo‘mitasi, “Chorvachilik sohasini barqaror rivojlantirishni moliyalashtirish” loyihasi Farg‘ona viloyati ofisi hamkorligida o‘tgan tadbir avvalida Marg‘ilon shahar Veterinariya va chorvachilikni rivojlantirish bo‘limida loyiha taqdimoti amalga oshirildi.

Taqdimotda davlatimiz rahbarining tegishli qaroriga asosan Farg‘ona viloyatida bajarilgan ishlar, loyiha imkoniyatlari haqida ma’lumot berildi. 

Umumiy qiymati 147.1 million yevro bo‘lgan ushbu strategik loyiha 2022-2026-yillarga mo‘ljallangan bo‘lib, uning bosh maqsadi chorvachilikni ilg‘or texnologiyalar asosida modernizatsiya qilish, mahsuldorlikni keskin oshirish va iqlim o‘zgarishiga moslashgan “yashil” iqtisodiyotni rivojlantirishdan iborat. 

Loyiha doirasida chorvachilik yo‘nalishidagi tadbirkorlarga milliy valyuta ekvivalentida 100 ming yevrogacha moliyaviy resurslar, 10 yilgacha bo‘lgan uzoq muddatga va 3 yillik imtiyozli davr bilan taqdim etilmoqda.

Xususan, viloyatda parrandachilik, baliqchilik, qoramolchilik, quyosh panellari o‘rnatish, chorvachilik texnika va uskunalari sotib olish, go‘shtni saqlashga mo‘ljallangan muzlatkich tashkil qilish, sutni qayta ishlash, chorvachilik ekin maydonlariga tomchilab sug‘orish tizimlarini o‘rnatish bo‘yicha imtiyozli kreditlar ajratilgani ma’lum qilindi. Grant mablag‘lari haqida to‘xtalib o‘tildi.

Shuningdek, tadbir davomida Farg‘ona shahridagi baliqchilik, Farg‘ona tumanidagi  chorvachilik, quyosh panellarini o‘rnatish loyihalari borib ko‘rildi.

Loyiha doirasidagi ishlar yuzasidan ishtirokchilarni qiziqtirgan savollarga javoblar berildi.