Farg‘оnа vilоyati hоkimligi

Tadbirda so‘z olgan viloyat hokimi turkiyalik investorlar bilan o‘tkazilgan kelishuvlar samarasida bugun "Turon turk" sanoat zonasini tashkil qilishga kirishilayotganligi, mazkur sanoat zonasi salohiyati, ko‘lami nuqtai nazaridan viloyatimizda alohida o‘rinda turuvchi sanoat zonasi bo‘lishiga ishonch bildirildi. Ushbu loyiha hudud taraqqiyotida yangi bosqichni boshlab berishi ta’kidlandi.

Barcha viloyat tashkilotlari, boshqarmalari bu ishni amalga oshirishda investorlarga ko‘makdosh bo‘lishi kerakligi ta’kidlandi. Qisqa muddatda sanoat zonani ishga tushirish hisobiga yangi ish o‘rinlari yaratilishi qayd etildi. Bu ishlarga bosh bo‘layotgan turk ishbilarmonlariga minnatdorlik bildirildi.

Tadbirda “Heyal Holding” kompaniyasi ta’sischisi Vahdettin Heyal O‘zbekistonda yaratilgan qulay investitsiya muhiti turk ishbilarmonlarining qiziqishini oshirayotganini qayd etib, Farg‘onada amalga oshirilayotgan ushbu loyiha hamkorlikning yangi sahifasini ochishini bildirdi.

Viloyat hokimining qo‘llab—quvvatlovi, bildirilgan ishonchi bilan ushbu loyiha amalga oshirilayotganligini ta’kidlab, loyihaning birinchi bosqichi sentabr oyida topshirilishi maqsad qilinganini ma’lum qildi.

Tadbirda nuroniylar ishtirokida duolar qilinib, yirik loyiha qurilishiga kirishildi.

Ma’lumot o‘rnida, Quva tumanida 26 gektar maydonda barpo etilayotgan “Turon turk” maxsus sanoat zonasining umumiy qiymati 350 million dollarni tashkil etadi. Unda meva-sabzavotlarni qayta ishlash, elektrotexnika, oziq-ovqat va to‘qimachilik sohalarida ishlab chiqarish loyihalari joylashtirilib, 5 mingga yaqin yuqori daromadli ish o‘rinlari yaratiladi. Loyihada eng zamonaviy texnologiyalar qo‘llaniladi.