Farğоnа vilоyati hоkimligi

Sessiya kun tartibiga ko‘ra, tuman hokimi Elyorbek Asronqulov Furqat tumanini “og‘ir” tumanlar toifasidan chiqarish, aholi bandligini ta’minlash va hududning ijtimoiy-iqtisodiy rivojlanishini jadallashtirish bo‘yicha amalga oshiriladigan ishlar yuzasidan tuman ahliga murojaat qildi.

Prezident Shavkat Mirziyoyev raisligida joriy yil 23-yanvar kuni o‘tkazilgan kambag‘allikni qisqartirish va aholi bandligini ta’minlash masalalariga bag‘ishlangan videoselektor yig‘ilishida 37 ta “og‘ir” tuman bo‘yicha aniq vazifalar belgilangan. Shu asosda Furqat tumanida ham aholi daromadini oshirish, ish o‘rinlari yaratish va hududni har tomonlama rivojlantirishga qaratilgan chora-tadbirlar dasturi ishlab chiqildi.

Murojaatda 34 ta mahallani yangicha yondashuvlar asosida jadal rivojlantirish rejalashtirilgani, hududiy investitsiya dasturi doirasida sanoat sohasida 79 ta, xizmat ko‘rsatish sohasida 65 ta, qishloq xo‘jaligida 36 ta loyiha amalga oshirilishi ma’lum qilindi. Shuningdek, bo‘sh turgan bino va maydonlarni tadbirkorlarga berish, har bir mahallaning ixtisoslashuvi bo‘yicha tizimli ishlarni yo‘lga qo‘yish belgilangan.

Ayni paytda 219 million dollarlik xorijiy investitsiyalar paketi shakllantirilgan bo‘lib, 140 million dollarlik 9 ta loyiha bo‘yicha kelishuvlarga erishilgan.

Budjet mablag‘lari hisobidan 238,2 milliard so‘m ajratilishi orqali 672 ta loyiha amalga oshirilib, 2 ming 20 ta yangi ish o‘rni yaratilishi ko‘zda tutilgan.

Shuningdek, elektr energiyasi va suv ta’minotini yaxshilash, aholi uchun munosib sharoitlar yaratish bo‘yicha tadbirlar amalga oshiriladi. “Yangi O‘zbekiston” qiyofasini shakllantirish rejalashtirilgan 5 ta mahalla uchun 46,4 milliard so‘m mablag‘ yo‘naltirilishi belgilangan.

Tuman hokimi mazkur vazifalarni to‘liq amalga oshirish orqali Furqat tumanini “og‘ir” tumanlar ro‘yxatidan chiqarish bo‘yicha qat’iy choralar ko‘rilishini ta’kidladi.

Sessiyada so‘zga chiqqan viloyat hokimi Xayrullo Bozorov rahbarlar va deputatlar oldida katta mas’uliyat turganini qayd etib, pirovard maqsad aholi bandligini ta’minlash, ishsizlikni kamaytirish, kambag‘allikni qisqartirish ekanini alohida ta’kidladi.

Har bir loyiha chuqur tahlil qilinib, aniq reja asosida amalga oshirilishi zarurligini qayd etdi. Sarflangan mablag‘lar manfaat keltirishi, munosib daromad olib kelishi muhimligiga e’tibor qaratdi. Tumanda tadbirkorlikni rivojlantirish, ularni loyiha takliflarini qo‘llab-quvvatlash zarurligi bildirildi. Har bir yo‘nalishdagi muhim vazifalar belgilab berildi. 

Shundan kelib chiqib, deputatlar ham o‘z munosabatlarini bildirishi, jarayonlarda faol bo‘lishlari kerakligi aytildi.

Sessiya davomida kun tartibidagi masala yuzasidan deputatlar fikrlari eshitildi.