Furqat tumanida axborot texnologiyalari sohasini rivojlantirish, yoshlarni zamonaviy kasblarga yo‘naltirish maqsadida “Innovation hub” innovatsion markazning tantanali ochilish marosimi bo‘lib o‘tdi
2026-01-29 09:15:00 / Yangiliklar
Tadbir davomida ramziy lenta kesilib, mehmonlar markazda yaratilgan shart-sharoitlar, o‘quv xonalari, zamonaviy texnika va uskunalar bilan yaqindan tanishdilar. Shuningdek, o‘quv jarayonlari, qo‘shimcha mashg‘ulotlar va yoshlar uchun yaratilgan imkoniyatlar haqida atroflicha ma’lumot berildi.
Ushbu innovatsion markazni tashkil etishdan ko‘zlangan asosiy maqsad — tuman yoshlarini zamonaviy va talab yuqori bo‘lgan kasblarga o‘qitish, ularning iqtidor va salohiyatini rivojlantirish, kelajakda raqobatbardosh mutaxassislar etib tarbiyalashdan iborat.
Markazda yoshlar uchun SMM, dasturlash, sun’iy intellekt, grafik dizayn kabi zamonaviy yo‘nalishlar bo‘yicha mashg‘ulotlar tashkil etilgan. Shuningdek, xorijiy tillarni o‘rganishga qiziquvchi o‘quvchilar uchun turk va koreys tillari bo‘yicha ham maxsus kurslar yo‘lga qo‘yilgan.
Ta’kidlash joizki, bunday innovatsion markazlar tuman yoshlarining bilim va ko‘nikmalarini oshirish, ularni zamon talablariga mos ravishda tayyorlashda muhim ahamiyat kasb etadi. “Innovation hub” kelgusida ham iqtidorli yoshlarni qo‘llab-quvvatlash, ularning g‘oya va tashabbuslarini ro‘yobga chiqarishga xizmat qilishi shubhasiz.