Farg‘onada “Fuqarolik jamiyati haftaligi” doirasidagi tadbirlar faollik bilan o‘tkazilmoqda
2025-11-29 18:25:00 / Yangiliklar
2024-yilda Prezident farmoni bilan har yili dekabrning birinchi haftasida mazkur haftalikni o‘tkazish belgilab qo‘yilgani ham bu yo‘nalishdagi yangicha yondashuvning amaliy ko‘rinishi sanaladi. Shuningdek, normativ-huquqiy bazaning takomillashuvi, Parlament komissiyasining faoliyat boshlashi va davlat grantlari mexanizmlarining kengayishi NNTlar uchun yangi imkoniyatlar yaratmoqda.
Farg‘onada o‘tgan haftalik doirasida uchrashuvlar, forumlar, konferensiyalar, ijtimoiy loyihalar taqdimotlari, shuningdek, mahalliy NNTlar tomonidan tayyorlangan mahsulotlar yarmarkasi tashkil etildi. Bular fuqarolik jamiyati institutlarining jamiyat hayotidagi o‘rni va ta’sirini yanada oshirishga xizmat qilmoqda.
Bugun Farg‘ona shahridagi Nodavlat notijorat tashkilotlari uyida o‘tgan yakuniy tadbir ishtirokchilarda katta taassurot qoldirdi. Unda viloyat hokimining o‘rinbosari Burhonjon Qo‘ldoshev ishtirok etib, fuqarolik jamiyatini rivojlantirishga munosib hissa qo‘shib kelayotgan nodavlat notijorat tashkilotlari rahbarlari va mas’ul xodimlari faoliyatini alohida e’tirof etdi. Ularga viloyat hokimligining esdalik sovg‘alarini topshirdi.
Bu e’tirof NNTlar mehnati va jamiyat rivojiga qo‘shgan hissasiga berilayotgan yuqori baho sifatida qabul qilindi.
Tadbir ishtirokchilari ta’kidlaganidek, bu kabi muloqot maydonlari davlat idoralari va fuqarolik jamiyati institutlari o‘rtasida ochiq, konstruktiv hamkorlikni yanada mustahkamlashga xizmat qiladi.