Farg‘оnа vilоyati hоkimligi

Tadbirda viloyat hokimi Xayrullo Bozorov g‘oliblarni samimiy tabriklab, ularning kelgusidagi faoliyatlariga omad va muvaffaqiyatlar tiladi.

So‘nggi 9 yilda mamlakatimizda amalga oshirilayotgan tarixiy islohotlar bugun jahon hamjamiyati tomonidan ham yuksak e’tirof etilayotgani, xalqimiz dunyoqarashi, turmush tarzi beqiyos darajada o‘zgargani, mana man degan davlatlar  Prezidentimiz tashabbuslarini tan olib qo‘llab-quvvatlayotgani ta’kidlandi.

Shunday bemisl yangilanishlar jarayonida davlat boshqaruvida bilimli, salohiyatli va vatanparvar kadrlarga ehtiyoj ortib borayotganiga e’tibor qaratildi. 
— Davlat xizmatchisi bo‘lish — bu shunchaki ish emas. Bu — xalq ishonchini oqlash, Vatanga sidqidildan xizmat qilish va mas’uliyatli qarorlar qabul qilish demakdir. Bu lavozim har birimizdan halollik, sadoqat va yuksak fuqarolik mas’uliyatini talab etadi, — dedi viloyat hokimi.
Inson tinimsiz izlanishi, ilm olishi, kasb-hunar egallashi va yurtiga sadoqat bilan xizmat qilishi lozimligi ta’kidlandi. 

“Istiqbolli davlat xizmatchisi” tanlovida ishtirok etib saralangan yoshlarga o‘z oldilariga qo‘ygan maqsadlariga erishishlariga, bilim va salohiyati bilan namuna bo‘lishlariga ishonch bildirildi. Mazkur tanlov har yili an’anaviy o‘tkazilishi ma’lum qilindi. 
 
Prezident huzuridagi Boshqaruv samaradorligi agentligi direktori o‘rinbosari Akmal  Salihov ham tadbirda so‘z olib, Milliy kadrlar zaxirasini shakllantirish bo‘yicha yurtimizda olib borilayotgan islohotlar haqida to‘xtalib o‘tdi. Viloyat hokimligi va Prezident huzuridagi Boshqaruv samaradorligi agentligi Farg‘ona filiali hamkorligida ilk bor “Farg‘ona tajribasi” asosida “Istiqbolli davlat xizmatchisi – 2025” tanlovi tashkil etilgani yuqori baholandi.

700 dan ziyod davlat xizmatchilari ishtirok etgan mazkur tanlov 5 bosqichda o‘tkazilib, ular orasidan 63 nafar munosib nomzod saralab olindi.

Unga ko‘ra, viloyat Iqtisodiyot va moliya bosh boshqarmasi shoʻba boshlig‘i Jamshidbek Jahbarov 1-o‘rinni, Furqat tumani Oila va xotin-qizlar bo‘limi bosh mutaxassisi Gulzoda Muxtorova 2-o‘rinni, viloyat adliya boshqarmasi shoʻba boshlig‘i Ziyodbek Halimjonov 3-o‘rinni qo‘lga kiritdi. Ular pul mukofotlari bilan taqdirlandilar.

Tadbirda “Istiqbolli davlat xizmatchisi -2025” tanlovining barcha g‘oliblariga sertifikatlar topshirildi.

Tanlov ishtirokchilari nomidan so‘zga chiqqanlar ko‘rsatilayotgan e’tibor va yaratilayotgan shart-sharoitlar uchun Davlatimiz rahbariga minnatdorchilik bildirdilar va kelgusida o‘z faoliyatlarini yanada samarali tashkil etib, yurt ravnaqiga munosib hissa qo‘shishlarini ta’kidladilar.