O‘zbekistonda sun’iy intellekt texnologiyalariga asoslangan loyihalar qo‘llab-quvvatlanadi – Prezident qarori
2025-10-31 08:50:00 / Vazirlik yangiliklari
O‘zbekiston Respublikasi Prezidentining “Sun’iy intellekt texnologiyalariga asoslangan loyihalarni qo‘llab-quvvatlashga oid qo‘shimcha chora-tadbirlar to‘g‘risida” 2025-yil 30-oktabrdagi PQ–320-son qarori imzolandi.
Qaror ijtimoiy soha va iqtisodiyot tarmoqlarida sun’iy intellekt texnologiyalarini keng joriy etish hamda davlat organlari va tashkilotlari faoliyatida mazkur texnologiyalarga asoslangan yechimlarni ishlab chiqishni jadallashtirish maqsadida qabul qilindi.
Ushbu qarorni qabul qilishning asosiy maqsadi — ijtimoiy soha va iqtisodiyot tarmoqlarida sun’iy intellekt texnologiyalariga asoslangan ustuvor va startap loyihalarni moliyalashtirishni kengaytirish hisoblanadi.
Qarorga muvofiq, Raqamli texnologiyalar vazirligiga Tiklanish va taraqqiyot jamg‘armasi mablag‘lari hisobidan O‘zbekiston Respublikasi Prezidentining 2024 yil 14 oktabrdagi PQ–358-son qaroriga asosan 2 yillik imtiyozli davr bilan 5 yil muddatga belgilangan miqdorda foizsiz kredit, shuningdek, O‘zbekiston Respublikasi Prezidentining 2025-yil 22-oktabrdagi PF–189-son Farmoniga asosan beg‘araz asosda ,belgilangan miqdorda hamda 3 yillik imtiyozli davr bilan 7 yil muddatga foizsiz kredit ajratiladi.
Shu bilan birga, O‘zbekiston Respublikasi Prezidentining 2024 yil 14 oktabrdagi PQ–357-son qaroriga asosan venchur jamg‘armalarni moliyalashtiruvchi “Fondlar fondi” hamda IT-park huzurida raqamli texnologiyalar sohasidagi startap loyihalarni moliyalashtiradigan “IT Park Ventures” venchur jamg‘armalari tashkil etildi.
Ijtimoiy soha va iqtisodiyot tarmoqlarida sun’iy intellekt texnologiyalariga asoslangan, shu jumladan, startap loyihalarni moliyalashtirish uchun Tiklanish va taraqqiyot jamg‘armasidan 2026–2027-yillarda qo‘shimcha mablag‘lar quyidagi maqsadlar uchun ajratiladi:
– belgilangan miqdordagi mablag‘ lar beg‘araz asosda davlat organlari va tashkilotlar faoliyatida sun’iy intellekt texnologiyalarini joriy etish uchun. Bunda ijtimoiy ahamiyatga ega loyihalarga ustuvorlik beriladi;
– belgilangan miqdordagi mablag‘ teng ulushlarda “Fondlar fondi” va “IT Park Ventures” venchur jamg‘armalari ustav kapitaliga Tiklanish va taraqqiyot jamg‘armasining ulushi sifatida kiritilishi orqali sun’iy intellekt texnologiyalariga asoslangan loyihalarni qo‘llab-quvvatlash uchun.