Xotin-qizlarni IT sohasiga jalb qilish bo‘yicha navbatdagi qadam tashlandi
2025-08-27 18:45:00 / Vazirlik yangiliklari
Xotin-qizlarni har tomonlama qo‘llab-quvvatlash, ularning salohiyatini to‘liq ro‘yobga chiqarish va IT hamda boshqa zamonaviy sohalarda muvaffaqiyatli karyera qurishda faol ishtirok etishini ta’minlash jamiyatimiz taraqqiyoti uchun muhim ahamiyat kasb etadi.
Ularni IT sohasi kabi istiqbolli yo‘nalishlarga jalb qilish orqali nafaqat ayollar bandligini oshirish, balki ularning innovatsion g‘oyalarini hayotga tatbiq etish hamda iqtisodiyot rivojiga bevosita hissa qo‘shish mumkin. Shu bois, ta’lim dasturlari, amaliy treninglar, grant va stipendiyalar, shuningdek, mentorlik loyihalarini tashkil etish xotin-qizlarning IT sohasida karyera boshlashini osonlashtiradi.
Shu yo‘nalishda yana bir muhim qadam tashlandi. Bugun, 27-avgust kuni Raqamli texnologiyalar vazirligi, School 21 va “GAP” Ayollar IT klubi hamkorligida “Orzudagi karyera sari yana bir qadam tashlang!” mavzusida tadbir bo‘lib o‘tdi.
Tadbirda School 21 ijrochi direktori Zarina Luxmanova, Person Hunters kompaniyasi asoschisi va biznes konsultant Yuliya Yakovleva, Beeline Uzbekistan kompaniyasida iste’dodlarni jalb qilish va moslashtirish bo‘yicha yetakchi mutaxassisi Otabek Umarov, shuningdek, TBC Bank kompaniyasida ommaviy iste’dodlarni jalb qilish bo‘limi yetakchi mutaxassisi Shirin Nazirova ishtirok etib, o‘z tajribalarini bo‘lishishdi.
Mutaxassislar IT sohasida karyera qurishni istagan yoshlar uchun amaliy tavsiyalar berishdi. Xususan, ish qidirish jarayoni, mehnat bozorida talab yuqori bo‘lgan yo‘nalishlar, dastlabki ish tajribasini to‘plash va xalqaro kompaniyalarda faoliyat yuritish imkoniyatlari haqida batafsil ma’lumot taqdim etildi.
Shuningdek, karyera o‘sishida doimiy o‘qish, yangi ko‘nikmalarni egallash va professional tarmoq (networking) yaratishning ahamiyati alohida ta’kidlandi.
Tadbir yakunida ishtirokchilar o‘zlarini qiziqtirgan savollarni berib, mutaxassislarning batafsil javoblarini olishdi. Bu esa ularning IT sohasida karyera qurish haqidagi bilim va tasavvurlarini yanada kengaytirdi.
Siz ham IT’da muvaffaqiyatli karyera qurishni istasangiz — bilim oling, bunday tadbirlarda faol ishtirok eting, tajriba orttiring va o‘zingiz uchun yangi imkoniyatlarni kashf eting!