Vazir Buxoroda Triple R Technologies kompaniyasi faoliyati, amalga oshirilayotgan innovatsion loyihalari bilan tanishdi
2025-08-17 10:50:00 / Vazirlik yangiliklari
Raqamli texnologiyalar vaziri Sherzod Shermatov Triple R Technologies kompaniyasining Buxoro shahrida faoliyat yuritayotgan ofisiga tashrif buyurdi.
Tashrif davomida vazir kompaniyaning faoliyati, amalga oshirilayotgan innovatsion loyihalari hamda kelgusidagi rejalar bilan tanishdi.
Tashrif chog‘ida alohida e’tibor RRR Universe onlayn ta’lim platformasiga qaratildi. Ushbu platforma O‘zbekiston yoshlari uchun IT, elektron tijorat va blockchain kabi zamonaviy kasblarni masofadan turib o‘rganish imkoniyatini yaratadi.
Ta’lim jarayonida interaktiv kurslar, master-klasslar, mentorlik dasturlari va xalqaro tajribalar asosida ishlab chiqilgan innovatsion yondashuvlardan foydalaniladi.
Mazkur loyiha yoshlarning nafaqat ichki, balki xalqaro mehnat bozorida ham raqobatbardosh mutaxassis bo‘lib yetishishiga xizmat qiladi.
Uchrashuvda, shuningdek, raqamli iqtisodiyotni rivojlantirishda WEB3 va blockchain loyihalarining o‘rni, yangi texnologiyalarni turli sohalarga integratsiya qilish imkoniyatlari hamda yoshlarni IT sohasiga jalb qilish masalalari muhokama qilindi.
Buxoroda raqamli texnologiyalarni keng tatbiq etish orqali hududni IT markazlardan biriga aylantirish istiqbollari ham ko‘rib chiqildi.