Buxorodagi IT Park rezident kompaniyalari bilan yangi imkoniyatlar muhokama qilindi
2025-08-16 12:35:00 / Vazirlik yangiliklari
Buxoro viloyatiga tashrifi doirasida Raqamli texnologiyalar vaziri Sherzod Shermatov viloyatdagi IT Park rezident kompaniyalari bilan uchrashuv o‘tkazdi.
Ushbu uchrashuvda raqamli texnologiyalar sohasidagi dolzarb masalalar, istiqbolli rejalar va IT loyihalar atroflicha muhokama qilindi.
Uchrashuvda IT Park rezidentlari tomonidan viloyatda axborot texnologiyalari sohasini rivojlantirish bo‘yicha amalga oshirilayotgan ishlar haqida ma’lumot berildi. Kompaniya vakillari o‘zlarining yangi tashabbuslari, mahalliy va xalqaro bozorlarda raqobatbardosh mahsulotlar ishlab chiqarish rejaları hamda raqamli iqtisodiyotni rivojlantirishdagi ishtiroklari haqida so‘zlab berdilar.
Shu bilan birga, innovatsion g‘oyalar va startap loyihalar, sohada amaliy bilim va ko‘nikmalarini oshirish bo‘yicha takliflar berdilar.
Vazir Sherzod Shermatov uchrashuv davomida mamlakatimizda raqamli transformatsiyani jadallashtirish, yoshlarni IT sohasiga jalb qilish va innovatsion ekotizimni mustahkamlash bo‘yicha tavsiyalar berdi.
Shuningdek, vazir yoshlarni qo‘llab-quvvatlash, ularning g‘oyalarini amalga oshirish uchun qulay shart-sharoitlar yaratish va xalqaro tajribadan foydalanish muhimligini qayd etdi.
Uchrashuvda muhokama qilingan asosiy masalalar qatorida raqamli infratuzilmani rivojlantirish, IT-ta’limni takomillashtirish, startaplarni moliyaviy qo‘llab-quvvatlash va xalqaro hamkorlikni kengaytirish kabi yo‘nalishlar alohida e’tiborga olindi.