NTT bilan uchrashuvda xalqaro loyihalar bo‘yicha hamkorlik masalalari muhokama qilindi
2025-05-18 08:00:00 / Vazirlik yangiliklari
Raqamli texnologiyalar vaziri Sherzod Shermatov NTT Communications kompaniyasining biznesni rivojlantirish bo‘limi ijrochi direktori bilan uchrashuv o‘tkazdi.
Muloqot davomida O‘zbekistonda xalqaro IT kompaniyalar uchun yaratilayotgan imkoniyatlar muhokama qilindi. Jumladan, IT Park rezidentlari uchun soliq imtiyozlari, rivojlangan infratuzilma va investorlarni qo‘llab-quvvatlash bo‘yicha davlat tomonidan ko‘rilayotgan chora-tadbirlar haqida batafsil ma’lumot berildi.
Shuningdek, NTT tomonidan ishlab chiqilayotgan innovatsion IOWN (Innovative Optical and Wireless Network) loyihasi taqdim etildi. Bu loyiha foton tarmoqlari, sun’iy intellekt va raqamli egizaklar asosida yangi avlod aloqa infratuzilmasini yaratishga qaratilgan bo‘lib, hozirda Osaka shahrida bo‘lib o‘tayotgan Expo 2025 ko‘rgazmasida keng jamoatchilikka namoyish qilinmoqda. Mazkur texnologiya real vaqt rejimida ma’lumotlarni tahlil qilish va turli sohalarda samaradorlikni oshirish imkonini beradi.
Uchrashuv yakunida NTT Communications vakillari va “O‘zbektelekom” AJ bilan hamkorlik qilish masalalari tavsiya etildi.
Shuningdek, kompaniyaga 2025 yil 23–26-sentabr kunlari bo‘lib o‘tadigan ICT WEEK tadbirida ishtirok etish va o‘z loyihasini xalqaro auditoriyaga taqdim etish taklifi bildirildi.