O‘zbekiston va Estoniya o‘rtasida raqamli boshqaruv sohalaridagi hamkorlik istiqbollari muhokama qilindi
2025-05-15 10:05:00 / Vazirlik yangiliklari
Raqamli texnologiyalar vazirining birinchi o‘rinbosari O.Pekos Estoniya e-Governance Academy (eGA) ijrochi direktori va Boshqaruv kengashi raisi Hannes Astok bilan uchrashuv o‘tkazdi. Uchrashuv davomida O‘zbekiston va Estoniya o‘rtasida raqamli boshqaruv, davlat xizmatlarini raqamlashtirish yo‘nalishlarida hamkorlikni yanada rivojlantirish masalalarini muhokama qilindi.
Uchrashuvda eGA faoliyati, xalqaro loyihalari va Estoniya tajribasi haqida ma’lumot berildi. 2002-yilda tashkil etilgan tashkilot bugungi kungacha 145 dan ortiq mamlakatda 370 dan ziyod loyihalarni amalga oshirgan bo‘lib, raqamli boshqaruv, elektron demokratiya va davlat xizmatchilarini raqamli transformatsiyaga tayyorlash asosiy yo‘nalishlar hisoblanadi.
Tomonlar davlat xizmatlari samaradorligini ta’minlash va hududiy boshqaruv organlarida raqamli imkoniyatlarni kengaytirish masalalariga alohida e’tibor qaratdi.
Mazkur hamkorlik davlat boshqaruvi samaradorligini oshirish, hududiy raqamlashtirishni rivojlantirish, kadrlar salohiyatini oshirish va elektron demokratiya tamoyillarini joriy etish orqali O‘zbekistonning raqamli transformatsiyasini jadallashtirishga xizmat qiladi.
Tomonlar tajriba almashish, ilg‘or texnologiyalarni joriy etish va “Raqamli O‘zbekiston – 2030” strategiyasi doirasida yangi loyihalarni amalga oshirish bo‘yicha hamkorlikni kengaytirishga kelishib oldilar.