Vazirlik huzuridagi STQ 18 “Axborot-kommunikatsiya texnologiyalari” bo‘yicha standartlashtirish texnik qo‘mitasining navbatdagi yig‘ilishi bo‘lib o‘tdi
2025-04-24 19:40:00 / Vazirlik yangiliklari
Yig‘ilish kengaytirilgan formatda o‘tkazilib, unda O‘zbekiston va Germaniyaning DIN (Deutsches Institut für Normung) – Standartlar instituti mutaxassislari hamda bir qator milliy texnik qo‘mitalar va idoralarning mas’ul mutaxassislari ham ishtirok etdi.
STQ 18 texnik qo‘mitasi raisi tomonidan ushbu formatdagi uchrashuv O‘zbekistonning xalqaro standartlashtirish hamjamiyati bilan samarali muloqoti va hamkorligini kengaytirishga qaratilgan muhim qadam sifatida xizmat qilishi ta’kidlab o‘tildi.
Yig‘ilish davomida qo‘mita tomonidan 2025-yilning birinchi choragida standartlashtirish bo‘yicha amalga oshirilgan ishlar natijalari, xalqaro standartlarni milliy standartlar sifatida qabul qilish, amaldagi standartlarni qayta ko‘rib chiqish va ularga qonunchilik talablariga muvofiq o‘zgartish kiritish bo‘yicha masalalar muhokama qilindi.
Shuningdek, amaldagi davlatlararo standartlarning Jahon savdo tashkilotining texnik to‘siqlar bo‘yicha kelishuv talablariga muvofiqligi yuzasidan tahlil natijalari ham yig‘ilish kun tartibida alohida o‘rin egalladi.
Yig‘ilish ishtirokchilari STQ 18 texnik qo‘mitasining tuzilmasi, asosiy yo‘nalishlari va faoliyat mexanizmlari bilan yaqindan tanishishdi. DIN ekspertlari qo‘mita faoliyatini xalqaro amaliyotlar asosida yanada samarali tashkil etish yuzasidan o‘z taklif va tavsiyalarini bildirishdi.