O‘zbekiston Respublikasi Raqamli texnologiyalar vazirligi

Cyber University delegatsiyasi Xitoy Xalq Respublikasining qator nufuzli oliy ta’lim muassasalari bilan uchrashuvlar o‘tkazdi.

Tashriflar doirasida kiberxavfsizlik, sun’iy intellekt, raqamli ta’lim, dasturiy injiniring va boshqa zamonaviy texnologiyalar yo‘nalishlarida strategik hamkorlikni yo‘lga qo‘yish bo‘yicha samarali muzokaralar olib borildi.

Delegatsiyaga Cyber University rektori Shuxrat Kayumov boshchilik qildi. Uchrashuvlar davomida tomonlar o‘rtasida akademik almashinuv, qo‘shma ilmiy loyihalar, ikki diplomli ta’lim dasturlari, zamonaviy laboratoriyalar tashkil etish va malaka oshirish bo‘yicha qator kelishuvlarga erishildi.

Xidian University — Kiberxavfsizlik bo‘yicha Xitoyda yetakchi

Delegatsiya tashrifini Sian shahridagi Xitoyning eng ilg‘or oliy o‘quv yurtlaridan biri – Xidian University’dan boshladi. Mazkur universitet kiberxavfsizlik yo‘nalishida mamlakat miqyosida 1-o‘rinda turadi.

Ma'lumot uchun: Xidian universiteti – Xitoyning ilg‘or va nufuzli oliy ta’lim muassasalaridan biri bo‘lib, bugungi kunda unda 39 mingdan ortiq talaba tahsil olmoqda. Universitet bitiruvchilarining mutaxassisligi bo'yicha ishga joylashish ko'rsatkichi 99 foizni tashkil etadi. Shuningdek, Xidian universiteti 67 ta xalqaro hamkorlikdagi zamonaviy ilmiy laboratoriyalarga ega.

Uchrashuv davomida universitetning “Kiber muhandislik” fakulteti faoliyati, ta’lim tizimi va ilmiy salohiyati bilan yaqindan tanishildi. 

Tomonlar xalqaro konferensiyalar tashkil etish, akademik almashinuv dasturlarini joriy qilish, xalqaro jurnallarda hamkorlikda maqolalar chop etish, “Campus-in-Campus” modeli asosida almashinuvlarni amalga oshirish bo‘yicha kelishuvga erishdilar. Tashrif yakunida strategik hamkorlikni mustahkamlovchi memorandum imzolandi.

Zhejiang University — Sun’iy intellekt va AI bo‘yicha dunyo yetakchilari safida

Keyingi manzil — dunyo miqyosida nufuzli oliygohlar qatoriga kiruvchi Zhejiang University bo‘ldi. Universitet QS World University Rankings’da yuqori o‘rinlarni egallagan bo‘lib, AI, Machine Learning va kompyuter injiniringi yo‘nalishlarida yetakchi hisoblanadi.

Muzokaralar davomida 2+2 va 3+1 formatidagi qo‘shma ta’lim dasturlari, professor-o‘qituvchilar va talabalar uchun malaka oshirish kurslari, hamkorlikda ilmiy tadqiqot laboratoriyalarini tashkil etish kabi yo‘nalishlar muhokama qilindi.

Zhejiang University rahbariyati O‘zbekistonda raqamli sohalarga qaratilayotgan e’tiborni yuqori baholab, keng qamrovli hamkorlikka tayyor ekanini bildirdi.

Beijing Institute of Technology (BIT) — Kriptografiya va AI bo‘yicha dunyo TOP-20ligida

Delegatsiya, shuningdek, Beijing Institute of Technology rahbariyati bilan uchrashuvlar o‘tkazdi. Shanghai Ranking’ga ko‘ra, BIT sun’iy intellekt, raqamli texnologiyalar, kriptografiya va kiberxavfsizlik yo‘nalishlarida dunyoda TOP-20 universitetlar qatoriga kiradi.

Tashrif davomida institutda mavjud “School of Cyberspace Science and Technology” faoliyati, professor-o‘qituvchilar va talabalar uchun yaratilgan sharoitlar, ilmiy-innovatsion markazlar, hamda zamonaviy kiberhujumlarga qarshi yechimlar bilan tanishildi.

Uchrashuv yakunida:

• “Bir makon, bir yo‘l” loyihasi doirasida qo‘shma ilmiy laboratoriya tashkil etish,
• “Ikki diplom” qo‘shma o‘quv dasturlarini yo‘lga qo‘yish,
• Malaka oshirish dasturlari va sertifikatsiya tizimini joriy etish,
• Kiberxavfsizlik bo‘yicha kadrlar tayyorlash borasida kelishuvga erishildi.

UESTC — Dasturiy injiniring bo‘yicha dunyo TOP-150 taligida

University of Electronic Science and Technology of China (UESTC) bilan ham samarali muloqotlar olib borildi. Universitet Software Engineering bo‘yicha jahon reytinglarida TOP-150 talikdan o‘rin olgan.

Tashrif davomida ta’lim jarayoni, ilmiy laboratoriyalar, talabalar uchun yaratilgan imkoniyatlar bilan tanishildi. Uchrashuv yakunida kiberxavfsizlik, dasturiy injiniring, ilmiy-tadqiqot ishlari va akademik almashinuv bo‘yicha uzoq muddatli strategik hamkorlik memorandumi bo‘yicha kelishuvga erishildi.

Hangzhou Dianzi University — Ilmiy innovatsiyalar markazi

Delegatsiya, shuningdek, Xanchjou shahridagi Hangzhou Dianzi University’ga ham tashrif buyurdi. Uchrashuv davomida zamonaviy o‘quv-ilmiy laboratoriyalar, ta’lim jarayoni va innovatsion infratuzilma bilan tanishildi. 

Tomonlar kiberxavfsizlik sohasida uzoq muddatli hamkorlikni yo‘lga qo‘yish yuzasidan kelishib oldilar hamda yaqin kunlarda memorandum imzolanishi rejalashtirildi.

Xulosa o‘rnida, Cyber University tomonidan amalga oshirilgan ushbu tashriflar universitetning xalqaro maydondagi ilmiy-akademik salohiyatini mustahkamlash, ilg‘or xorijiy tajribalarni ta’lim jarayoniga joriy etish va raqamli sohaga oid yetakchi kadrlarni tayyorlash borasidagi izchil strategiyaning muhim bosqichidir.

Universitet kelgusida ham xalqaro miqyosdagi yetakchi oliygohlar bilan hamkorlikni kengaytirish, zamonaviy texnologiyalarni o‘quv jarayonlariga integratsiya qilish hamda raqamli ta’lim sifatini oshirishda faol ishtirok etishda davom etadi.