O‘zbekiston Respublikasi Raqamli texnologiyalar vazirligi

Mazkur loyiha atrof-muhitni muhofaza qilish, yashil hududlarni kengaytirish hamda ekologik muvozanatni saqlash maqsadida yo‘lga qo‘yilgan bo‘lib, davlat idoralari, xususan, Raqamli texnologiyalar vazirligi tomonidan faol qo‘llab-quvvatlanmoqda. 

Raqamli texnologiyalar vazirligi hamda vazirlik tizimidagi korxona va tashkilotlar tomonidan Toshkent, Andijon, Namangan va Navoiy viloyatlarida jami 66 523 tadan ortiq turli manzarali va mevali daraxt ko‘chatlari ekildi. 

Xususan, Toshkent viloyatining Bo‘stonliq tumanida 60 gektar maydonda “Vazirlik bog‘i” tashkil etilib, bu yerga 28 800 tupdan ortiq bodom, 1 200 tup sadaqayrag‘och, 2 mingdan ortiq tuyaarcha va 20 tadan ortiq shumtol ko‘chatlari ekildi.

Shuningdek, Andijon viloyatida Andijon tumani “Doʻngqishloq” MFY hududida jami 15 ming tup daraxt va manzarali ko‘chatlar ekildi. Sug‘orish tizimi uchun maxsus suv havzalari qurilib, zamonaviy quvurlar tortildi.

Bundan tashqari, Namangan viloyatining Pop tumanida joylashgan “Pop” davlat o‘rmon xo‘jaligi hududida esa 3 600 tadan ortiq mevali daraxt ekilib, tomchilab sug‘orish tizimi joriy etildi.

Navoiy viloyati Konimex tumanida esa 25 gektar maydonda 9 ming tup bodom, 1 000 tup jiyda va 5 000 tupdan ortiq So‘g‘diyona navli uzum ekildi.

Tashkilotchilar ma’lum qilishicha, ekilgan daraxtlarni muntazam parvarish qilish ishlari davom etadi. Mazkur loyiha nafaqat O‘zbekistonning ekologik holatini yaxshilash, balki aholining turmush sifati va shaharlarning obodonlashtirish darajasini oshirishga xizmat qiladi.

O‘zbekiston shahar va qishloqlarini ko‘kalamzorlashtirish ishiga o‘z hissangizni qo‘shishingiz mumkin! Agar Siz ham ushbu tashabbusni qo‘llab-quvvatlash niyatida bo‘lsangiz, Uztelecom va Mobiuz Mobil operetorlarining – Uztelecom (Google Play | IOS) hamda Mobiuz (Google Play | IOS) ilovalarida yo‘lga qo‘yilgan xayriya aksiyasida ishtirok eting va birgalikda yurtimizni yanada yashil va fayzli bo‘lishida o‘z hissangizni qo‘shing.