Xalqaro informatika olimpiadasiga tayyorgarlik to'g'risida tashkil etilgan o‘quv mashg‘ulotlari ishtirokchilari va Zulfiya nomidagi Davlat mukofotining 2025-yilgi sovrindorlari bilan uchrashuv o‘tkazildi
2025-03-20 21:00:00 / Vazirlik yangiliklari
Bugun, 20-mart kuni Raqamli texnologiyalar vaziri Sherzod Shermatov Xalqaro informatika olimpiadasiga tayyorgarlik ko‘rish maqsadida o‘quv mashg‘ulotlarida ishtirok etgan o‘quvchilar va Zulfiya nomidagi Davlat mukofotining 2025-yilgi sovrindorlari bilan uchrashuv o‘tkazdi.
2026-yilda ilk bor nufuzli IOI- Xalqaro informatika olimpiadasiga O'zbekiston mezbonlik qiladi. Joriy yildan boshlab ushbu olimpiadaga munosib tayyorgarlik ko‘rish maqsadida xorijdan murabbiylar jalb qilib, o‘quvchilarni olimpiadaga tayyorlash jarayonlari boshlandi.
Xususan, 2025-yil davomida 6, 7, 8-sinf o‘quvchilari hamda mahalliy murabbiylarni xorijlik ekspertlar ishtirokida tizimli ravishda o‘qitish orqali Xalqaro informatika olimpiadasiga tayyorlash jarayonlari amalga oshirilmoqda.
Qolaversa, joriy yilning 17-18-may kunlari O‘zbekiston onlayn mezbonlik qilayotgan APIO-Osiyo Tinch okeani mintaqasi informatika olimpiadasi, 14-20-iyul kunlari Germaniyadagi Informatika bo‘yicha Yevropa qizlar olimpiadasi, 27-iyuldan 3-avgustga qadar Boliviyada Xalqaro informatika olimpiadalari o‘tkaziladi. Ushbu olimpiadalar ham 2026-IOI uchun o‘ziga xos tayyorgarlik vazifasi o‘taydi.
Shu maqsadda Polsha davlatidan taklif etilgan xorijiy ekspert Kamil Shimchak trenerligida Xalqaro informatika olimpiadasi uchun saralanayotgan 30 nafar o‘quvchi yoshlar uchun 10-20-mart kunlari intensiv mashg‘ulot tashkillashtirildi. 10 kun davom etgan o‘quv mashg‘ulotlarida o‘quvchilarning murakkab algoritmik masalalarni yechish ko‘nikmalarini rivojlantirish, mantiqiy fikrlash qobiliyatini mustahkamlash, samarali strategiyalar ishlab chiqish va ularni amaliyotda qo‘llash, shuningdek, tezkor qaror qabul qilish ko‘nikmalarini shakllantirish ustida ishlandi.
Shuningdek, trening davomida C++ dasturlash tilini chuqur o‘rganish bo‘yicha amaliy mashg‘ulotlar ham olib borildi.
Kamil Shimchak to‘rt yildan ortiq vaqt davomida o‘rta maktabda haftalik dasturlash va algoritmlar bo‘yicha dars o‘tib, Polsha informatika olimpiadasining final bosqichiga o‘quvchilarni muvaffaqiyatli tayyorlagan. Ushbu faoliyati natijasida o‘quvchilar ikkita kumush va ikkita bronza medali bilan final bosqichiga yo‘llanmani qo‘lga kiritgan.
Bundan tashqari, Shimchak universitet talabasi sifatida ICPC musobaqalarida ishtirok etib, 2023-yilda Polsha talabalar dasturlash musobaqasida kumush, 2024-yilda esa Markaziy Yevropa mintaqaviy musobaqasida bronza medali sohibi bo‘lgan.
Kelgusida bunday intensiv mashg‘ulotlarni muntazam ravishda o‘tkazish rejalashtirilgan bo‘lib, bu informatika bo‘yicha xalqaro olimpiadalarda yurtimiz sharafini munosib himoya qiluvchi yoshlardan iborat kuchli terma jamoalarni shakllantirishga xizmat qiladi.
Vazirning iqtidorli yoshlar bilan uchrashuviga yana bir muhim sabablardan biri joriy yil ilk bor Zulfiya nomidagi Davlat mukofoti yo‘nalishlari safiga IT sohasini ham qo‘shilgani bo’ldi.
Quvonarlisi, bu yil IT sohasida faoliyat yuritib, yuksak natijalarga erishgan 4 nafar xotin-qizlar ushbu mukofot bilan taqdirlandi.