O‘zbekiston Respublikasi Raqamli texnologiyalar vazirligi

Vazirlikning 2025-yil 4-fevral kuni bo‘lib o‘tgan yig‘ilishida Raqamli texnologiyalar vaziri Sh.Shermatov sohada amalga oshirilayotgan ma’naviy-ma’rifiy ishlarga to‘xtalib, olib borilayotgan ishlar, bu borada ko‘rilayotgan choralar talab darajasida emasligini, Muhammad al-Xorazmiy nomidagi axborot texnologiyalari universitetida davlatimiz rahbari raisligida 2023-yil 22-dekabr kuni o‘tkazilgan Respublika Ma’naviyat va ma’rifat kengashining kengaytirilgan yig‘ilishida belgilangan vazifalar doirasida tashkil etilgan “Ma’naviyat va ma’rifat markazi” faoliyati bilan tanishgan holda har bir soha korxonasida shunday markaz yoki xonalar tashkil qilish zarurligini ta’kidlab o‘tgan edi.

Mazkur topshiriq ijrosini ta’minlash maqsadida Vazirlik tizimidagi korxona va tashkilotlarning ma’naviy-ma’rifiy ishlarga mas’ul rahbar va xodimlari Universitet talaba-yoshlarini milliy tarix, madaniyat va ajdodlarimiz merosiga hurmat ruhida tarbiyalash, ularning intellektual va ijodiy salohiyatini oshirishga xizmat qilish maqsadida tashkil qilingan Markaz faoliyati bilan tanishtirildi.

Universitet rektori B.Maxkamov hamda Yoshlar masalalari va ma’naviy-ma’rifiy ishlar bo‘yicha birinchi prorektori, shuningdek, boshqa mas’ullar talaba-yoshlarni milliy tariximiz, xalqimizning buyuk an’analari va ajdodlarimiz merosiga tayangan holda tarbiyalash, ularning intellektual salohiyatini yuksaltirish hamda kreativ tafakkurni shakllantirish maqsadida ochilgan va milliy qadriyatlarimiz va urf-odatlarimizni targ‘ib qiluvchi ko‘rgazmali pavilion, jadidlar burchagi, Renessans poydevori namoyondalari burchagi, taniqli yozuvchi va shoir Said Ahmad va Saida Zunnunovalarning hayoti va ijodiga bag‘ishlangan muzey, Yangi O‘zbekiston – yangicha dunyoqarash burchagi, Ijodkor yoshlar klubini o‘z ichiga qamrab olgan markaz faoliyati haqida batafsil ma’lumot berishdi.  

Raqamli texnologiyalar vaziri maslahatchisi N.Abdullayev nafaqat Vazirlik, balki tizimdagi korxona va tashkilotlarda ham ma’naviy-ma’rifiy ishlarni yanada takomillashtirish, sohada faoliyat yuritayotgan minglab xodimlarning ushbu yo‘nalishdagi bilim va ko‘nikmalarini oshirish, ularni vatanparvarlik, Vatanga muhabbat hislarini kuchaytirish, bu borada mazkur yo‘nalishda faoliyat olib borayotgan tashkilotlar, xususan, Respublika Ma’naviyat va ma’rifat markazi bilan yaqindan hamkorlik aloqalarini o‘rnatish kerakligini, shuningdek, tadbirni o‘tkazishdan ko‘zlangan maqsad Universitet Markazini shundayligicha ko‘chirib olish emas, balki mazkur Markaz bilan tanishib, undagi ijobiy tajribaning hech bo‘lmaganda bir qismini soha korxonalarida joriy qilish zarurligin, zero, mamlakatimiz Prezidenti, Respublika Ma’naviyat va ma’rifat kengashi raisi Shavkat Mirziyoev ta’kidlaganlaridek, agar kimdir, ma’naviyat masalasi — bu faqat ma’naviyat markazi yoki tegishli vazirlik va idoralarning ishi, deb o‘ylasa, xato qiladi, degan fikrlarni ilgari surdi.

Bundan tashqari, tadbir ishtirokchilari Universitetda “Qadriyatlaring boqiy bo’lsin - Navro’z” shiori ostida tashkil qilingan va 3000dan ziyod oliygoh talabalari, xodimlari, professor-oʻqituvchilari, davlat va jamoat tashkilotlari, MFY faollari qatnashgan Navro‘z saylida ham ishtirok etishdi.